Jasóspirim balýandar kúresten álem chempıonatynan eki altyn medal jeńip aldy
ASTANA. KAZINFORM – Ázerbaıjan astanasy Baký qalasynda ótip jatqan 17 jasqa deıingi sportshylar arasyndaǵy kúresten álem chempıonatynda Qazaqstan quramasynyń ókilderi Dııar Amanáli men Baqdáýlet Aǵabek altyn medal ıelendi, dep habarlaıdy QR Týrızm jáne sport mınıstrliginiń baspasóz qyzmeti.
Erkin kúresten 48 kelige deıingi salmaq dárejesinde synǵa túsken Baqdáýlet Aǵabek fınalda Úndistan ókili Aarıan Aarıandy 10:0 esebimen tehnıkalyq basymdyq arqyly merziminen buryn jeńip, álem chempıony atandy.
Chempıondyqqa deıingi jolynda qazaqstandyq balýan bes beldesýdiń barlyǵynda jeńiske jetti. Іrikteý kezeńinde Tájikstan ókili Mýslıhıddın Hodjıevti (10:0), 1/8 fınalda Bolgarııa balýany Emır Djevatovty (10:0) merziminen buryn utty. Shırek fınalda Mońǵolııa ókili Temúúlen Ýsýhbaıardy nebári 36 sekýndta 10:0 esebimen jeńse, jartylaı fınalda 2026 jylǵy U17 Azııa chempıony, ózbekstandyq Farrýh Mahmýdovtan 7:3 esebimen basym tústi.
Qazaqstan qorjynyna taǵy bir altyn medaldy 30 shilde kúni grek-rım kúresinen 55 kelige deıingi salmaqta óner kórsetken Dııar Amanáli saldy.
Týrnırdiń alǵashqy beldesýinde ol Grekııa ókili Nıkolaos Zınısısti 8:0 esebimen merziminen buryn jeńdi. Keıin Reseı sportshysy Edem Paızıevten 3:1 esebimen basym tústi. Shırek fınalda grýzııalyq Georgıı Kedelıdzeni 2:1 esebimen jeńse, jartylaı fınalda Bolgarııa ókili Danımır Iordanovty 8:1 esebimen aıqyn utyp, fınalǵa joldama aldy.
Altyn medal úshin ótken sheshýshi beldesýde Dııar Amanáli Vengrııa ókili Keve Kovachpen kezdesti. Negizgi ýaqyt 1:1 esebimen aıaqtaldy. UWW erejesine sáıkes, alǵashqy nátıjeli ádisti oryndaǵan qazaqstandyq balýanǵa jeńis berildi.
Osylaısha, Dııar Amanáli men Baqdáýlet Aǵabek álem chempıonatynyń jeńis tuǵyrynyń eń bıik satysyna kóterilip, Qazaqstan quramasyna 17 jasqa deıingi sportshylar arasyndaǵy álem chempıonatynyń eki altyn medalin syılady.
Osyǵan deıin habarlaǵanymyzdaı, Qazaqstan áıelder kúresinen U17 álem chempıonatyn eki medalmen aıaqtady.
