Jasóspirim apparattan energetıkalyq sýsyn satyp alsa, jaýapkershilik kimge júkteledi

ASTANA. KAZINFORM — Elimizde 21 jasqa tolmaǵan jasóspirimderge energetıkalyq sýsyn satýǵa tyıym salyndy. Jańa tyıymnyń mán-jaıyn zańger Arjan Sádýaqas túsindirip berdi.

энергетикалық сусын
Фото: pixabay.com

— Qańtar aıynan bastap 21 jasqa tolmaǵan jastarǵa energetıkalyq sýsyn satýǵa qatań tyıym salyndy. Eger kásipker satqan jaǵdaıda ákimshilik jaýapkershilikke tartylady, ıaǵnı 15 AEK (aılyq eseptik kórsetkish) kóleminde aıyppul salynady. Eger de ekinshi ret satqany dáleldense, aıyppul kóteriledi, úshinshi, tórtinshi jaǵdaıda múmkin, qylmystyq jaýapkershilikke alyp keledi. Ákimshilik quqyq buzýshylyq qaıtalanyp jatsa, áreketteri úshin onyń jazasy kóbeıe beredi, — dedi Arjan Sádýaqas Kazinform agenttigine bergen suhbaty barysynda.

Odan ári zańger kásipkerlerdiń jaǵdaıyna toqtaldy. 

— Satyp jatqan kásipkerler ǵoı, túsinbeıdi de avtomatty apparat qoıyp qoıady, satýshy joq. Ondaı jaǵdaıda avtomatty apparattyń ıesi jaýapkershilikke tartylady. Satýshy bolmasa da ıesi bolǵandyqtan búkil jaýapkershilikti ózi alady. Basqa da óz ózine qyzmet kórsetetin dúkenderden satyp alǵan bolsa, mindetti túrde sol avtomatty apparattyń ıesi jaýapqa tartylady. Odan bólek, sórelerde 21 jasqa tolmaǵan azamattarǵa temeki satylmaıdy degen eskertý jazba turady, sol sııaqty dúkenderde, sórelerde jáne kassanyń janynda mindetti túrde «21 jasqa tolmaǵan azamattarǵa energetıkalyq sýsyn satýǵa tyıym salynady» degen jazba bolýy tıis. Eger jazba bolmasa, aldymen eskertý jasalady, ekinshi jaǵdaıda aıyppul, ıaǵnı ákimshilik jaýapkershilikke tartylady. Bul bir jaǵynan adamǵa psıhologııalyq turǵydan áser etedi, satyp alýshy 21 jasqa deıin bolmaıdy degen jazýdy kórip turady. Bizge tutynýshy retinde dúkender satýǵa mindetti, biraq osyndaı talaptary bar, — deıdi ol.

Onyń aıtýynsha, dúken ıesi nemese satýshy tutynýshynyń 21 jasqa tolǵanyna kúdiktense, jeke basyn kýálandyratyn qujatty suraýǵa quqyly. 

Eske sala keteıik, Májilis jastarǵa energetıkalyq sýsyndar satýǵa tyıym salý týraly zańdy byltyr qabyldady

Сейчас читают