Jasóspirim 18 jastaǵy qyzdy pyshaqtaǵan: Astana prokýratýrasy istiń mán-jaıyn jarııa etti

ASTANA. KAZINFORM – Elordada jasóspirim qyzǵanyshtan 2006 jyly týǵan qyzdy pyshaqtap óltirmek bolǵan. Abyroı bolǵanda, kóptegen jaraqat alǵan qyz aman qalǵan. Bul týraly Astana qalasy prokýratýrasynyń Memlekettik aıyptaýdy qoldaý jáne apellıatsııalyq satyǵa qatysý basqarmasynyń aǵa prokýrory Azamat Toqtarbaı aıtty. 

Qylmys 2024 jyldyń 25 mamyrynda jasalǵan. Jasóspirim kúdikti tanys qyzdy páterden syrtqa beınebaqylaý kameralary ornatylmaǵan baspaldaq alańyna shyǵýǵa kóndirgen.

— Sol jerde birneshe ret ómirlik mańyzdy organdaryna ańshy pyshaǵymen jaraqat salǵan. Jasóspirim bul áreketin aldyn ala josparlap, pyshaq pen qolǵap daıyndaǵan, — deıdi aǵa prokýror.

Qyz aýyr jaraqat alǵanyna qaramastan, der kezinde kórsetilgen medıtsınalyq kómektiń arqasynda aman qaldy.

2025 jylǵy 3 aqpanda sot jasóspirimdi Qylmystyq kodeksiniń 24-babynyń 3-bóligi jáne 99-babynyń 1-bóligi (Kisi óltirýge oqtalý), sondaı-aq 287-babynyń 1-bóligi (Sýyq qarýdy zańsyz alyp júrý) boıynsha kináli dep tanydy. Qylmys jıyntyǵy boıynsha ol 5 jyl 7 aı merzimge bas bostandyǵynan aıyryldy.

Aıta keteıik, kisi óltirgeni úshin Qylmystyq kodekste ómir boıyna, al qarýdy zańsyz qoldanǵany úshin 10 jylǵa deıin bas bostandyǵynan aıyrý jazasy qarastyrylǵan.

Sot jasóspirimniń jastyǵyna qaramastan, onyń áreketi maqsatty jáne erekshe qatygezdikpen jasalǵanyn eskerdi.

Eske salsaq, jýyrda Aqtaýda bir top jasóspirim 11-synyp oqýshysyna oq atyp, aýyr jaralady.