Jasóspirimderdiń quqyn qorǵaıdy degen organ zań buzdy - prokýratýra
ASTANA. 29 sáýir. QazAqparat /Aıdar Ospanalıev/ - Astanada qalalyq quqyq qorǵaý organdary úılestirý keńesiniń otyrysy ótýde. Otyrys barysynda prokýratýra ókilderi elordada kámeletke tolmaǵandardyń quqyqtaryn qorǵaý máselesiniń talapqa saı emestigin atap kórsetti.
Qalalyq prokýratýra ókilderi jýyrda ǵana osy másele boıynsha, ıaǵnı quqyq qorǵaý jáne ózge de quzyrly organdardyń kámeletke tolmaǵandardyń quqyqtaryn qorǵaý baǵytyndaǵy atqaryp jatqan jumystaryn teksere kele osyndaı baılam jasaǵan. Tekserý júrgizilgen Astana qalasynyń Іshki saıasat jáne Bilim basqarmalary men Іshki ister departamenti sondaı-aq Astana ákimdigi janyndaǵy kámeletke tolmaǵandardyń isteri jáne olardyń quqyqtaryn qorǵaý komıssııasy jasóspirimder arasyndaǵy qylmystyq jáne tártip buzý áreketteriniń aldyn alý maqsatynda ózderiniń quzyrlary men zań aıasynda birqatar sharalar atqarǵan. Alaıda osy jumystar barysynda kámeletke tolmaǵandardy tárbıeleý men olarmen baılanysty jaǵdaıdy saýyqtyrýǵa keri áser etetin máselelerdi anyqtaǵan. Naqtyraq aıtqanda, Astana qalalyq Іshki ister basqarmasynyń konkýrstyq komıssııasy tıisti zańdardy buza otyryp, biliktilik talaptaryna saı kelmeı turǵandyǵyna qarmastan «Esirtkisiz bolashaq» korporatıvtik qoryn konkýrstyń jeńimpazy dep taýyp, atalmysh ujymǵa jasóspirimder arasyndaǵy jaǵdaıdy saýyqtyrý sharalaryn uıymdastyrýǵa arnalǵan 2 mıllıon 550 myń teńgeni bólip bergen.
