Jasóspirimderdiń 30 paıyzy ómirlerinde bir ret bolsyn óz-ózderine qol salýdy oılaǵan

Bul týraly búgin Astanada «QazAqparat» tilshisine bergen suhbatynda Astana qalasy Ákimshilik polıtsııa basqarmasynyń psıholog-ınspektory, kapıtan Elnur Qalıeva málim etti.

«Sonymen qatar stýdentterdiń 64 paıyzǵa jýyǵy mamandyqty áke-shesheleriniń aıtýymen tańdap, keıin olardyń jartysy bilim alǵan mamandyqtar boıynsha oqymaıtyn kórinedi. Alkogoldik ishimdikterdi tatyp kórgen jastardyń 45 paıyzy ózderi úshin araq-sharap ómirdegi qıyndyqtardy umytýǵa jáne basyna túsken isten demalýdyń bir ádisi bolyp tabylatyndyǵyn aıtqan. Al jasóspirimderdiń 70 paıyzy ata-analarynan aýlaq kóship ketýge armandaıtyn bolyp shyqqan», - dedi E.Qalıeva.

Mundaı málimet arnaıy zertteýler barysynda anyqtaldy. Munymen qosa, jasalǵan saýalnama negizinde, jasóspirimderdiń 75 paıyzy ózderiniń ata-analarynan erte bolǵan jynystyq qatynas týraly jasyratyndyǵy, balalardyń 80 paıyzy alǵashqy mahabbat jaıynda sóz qozǵamaıtyndyǵy, 60 paıyzy jynystyq qatynas taqyrybynda sóılesýden jaltarýdy qup kóretindigi anyqtalǵan.

Osy maqsatta búgin basqarma psıhologtary elordadaǵy M.Tynyshpaev atyndaǵy Kólik jáne kommýnıkatsııa akademııasynda birinshi kýrs stýdentterimen kezdesý ótkizip, erte jynystyq qatynastan, araq-sharaptan jáne esirtkiden boılaryn aýlaq ustaý jóninde jáne onyń zııany jaıynda lektsııa oqydy.

«Jasóspirimdik kezeń 10-11 jasynda bastalyp, 17 jasqa deıin jalǵasady. Osy aralyqta balanyń tárbıesine úlken kóńil bólip, ony erekshe meıirimge bóleý qajet. Bul kezeńde óz-ózine qol jumsaý syndy aýtoagressıvti kóńil kúı paıda bolýy yqtımal», - dep atap ótti ol.