Jasóspirimderdi jattyqtyrý úshin japon bapkerleri tartylady - dzıýdo federatsııasy

ASTANA. QazAqparat – BAQ ókilderiniń qatysýymen ótken brıfıngide Qazaqstan dzıýdo federatsııasynyń bas hatshysy Ashat Jitkeev balalardy jattyqtyrý úshin japon bapkerlerin tartý josparlanǵanyn aıtty, dep habarlaıdy QazAqparat tilshisi.

«30 jylda biz áli altyn medal (dzıýdo sportynan – avtor túsindirmesi) almadyq. Jeńiske jetý úshin jan jaqtan bilim jınaý qajet. Sol úshin frantsýz mamandardy alyp keldik. Sonymen qatar, Japon bapkerlerin shaqyrý josparda bar. Bir ret osy elden maman alǵan bolatynbyz. Degenmen onyń bizdiń quramaǵa yńǵaıy kelmedi. Sondyqtan biz jasóspirimder jáne balalardy jattyqtyrý úshin japon bapkerlerin izdep júrmiz», - dep toqtaldy Ashat Jitkeev.

Buǵan qosa, spıker olımpıada oıyndaryna qatystyrý úshin Qazaqstan ózge elderden legıoner almaıtynyn basa aıtty.

«Ózimizdiń elde 90 myń dzıýdoshy bar. Legıoner alý oıda joq. Basymdyqty el sportshylaryna beremiz. Sol úshin de tek shetelden bapker aldyrtyp jatyrymyz. Ózimizdiń qarapaıym jigitterimiz ben qarakóz qyzdarymyzǵa bar tájirıbeni berip, jemisin kóremiz dep senemin», - dep pikir qosty Ashat Jitkeev.

Eske sala keteıik, 16-18 maýsym aralyǵynda Astanada dzıýdodan «Qazaqstan Barysy Grand Slam» týrnıri ótedi. Oǵan álemniń 42 elinen kelgen 300-den astam sportshy qatysady.