Jasóspirimderdi vaktsına alýǵa psıhologııalyq jaǵynan daıyndaý mańyzdy ma – maman jaýaby

ALMATY. QazAqparat - Jasóspirim ekpege psıhologııalyq turǵydan daıyn bolýy kerek. Mundaı pikirdi Almatydaǵy №1 qalalyq emhanasynyń profılaktıka jáne áleýmettik-psıhologııalyq kómek bólimshesiniń psıhology Tana Kenjetaeva bildirdi.

- Tana Beıbitqyzy, koronavırýsqa qarsy jappaı ekpe bastalǵaly áleýmettik jelilerde túrli beınerolıkter men antıvakserlerdiń habarlamalary tarap jatyr. Bul jasóspirimderge áser etýi múmkin be?

– Jasóspirimder jasyna jáne jetkiliksiz bilimine baılanysty bul protsestiń ǵylymı negizin túsine bermeıdi. Jáne olar úlkenderdiń sózine senedi. Demek, antıvakserlerge nanyp qalýy múmkin. Bul jerde ata-ananyń róli óte mańyzdy. Olar jasóspirimge vaktsınanyń tıimdiligin túsindirýi kerek. Ol ne úshin kerek degen saýalǵa tolyqqandy jaýap bergen abzal. Balalar ımmýnologııa zertteıtin protsesterdi árdaıym túsine bermeıtinin este ustaǵan jón.

– Vaktsınatsııa aldynda jasóspirimder men olardyń ata-analaryna qandaı psıhologııalyq daıyndyq qajet?

– Árıne, psıhologııalyq daıyndyq kerek. Adamǵa senim artý óte mańyzdy. Balany egý pýnktine aparmas buryn, aldyn ala túsindirgen durys. Vaktsınatsııaǵa qalypty psıhologııalyq jaǵdaıda kelý kerek, eshteńeden qorqýdyń qajeti joq. Tamaqtaný da qalypty bolýy kerek. Uıqynyń uzaqtyǵyna arnaıy talaptar joq. Eger qandaı da bir manıpýlıatsııalar jasalsa, muny medıtsınalyq uıymdarda jasaǵan jón.

Qazir jasóspirimge vaktsınany mektepte alǵan durys degen másele qarastyrylýda. Óıtkeni, bul onyń jaıly aımaǵy, ol ózine tanys jandarǵa senedi. (Muǵalimge, feldsherge, synyptastaryna). Bul árkimniń tańdaý quqyǵy.

Adamǵa qaı jerde qolaıly bolsa, sol jerde vaktsınany saldyra alady. Eń bastysy, medıtsınalyq protsedýra kezinde barlyq sanıtarlyq normalar saqtalýyn qadaǵalaý kerek.

Vaktsınatsııa aldynda dárigerdiń tekserýinen ótedi. Ony bilesizder. Eger balanyń dene qyzýy 37 ° C-tan joǵary bolsa, vaktsınatsııa keıinge qaldyrylady.

– Sizdiń oıyńyzsha, balanyń ózinen vaktsına alasyń ba? dep suraǵan durys pa, álde ata-anasynyń kelisimi jetkilikti me?

– Meniń pikirimdi bilgińiz kelse. Onda ıá. Jasóspirimniń ózinen de suraý kerek. Baladan vaktsına týraly ne biletinin surańyz. Epege qatysty onyń oıyn da bilgen jón. Biraq jaýapkershilik, árıne, jasyna baılanysty ata-anasyna júkteledi. Sondyqtan bul jerde ata-ananyń kelisimi qajet.

– Vaktsınatsııa kezinde ata-ananyń qatysýy qanshalyqty mańyzdy?

– Vaktsınatsııa - kúrdeli protsedýra. Sondyqtan, ekpe salý kezinde jasóspirim úshin ata-ananyń bolýy, meniń oıymsha, qajetti aspekt. Ata-ananyń biri qasynda bolǵanda, ol ózin erkin sezinedi. Balanyń da, ata-ananyń da psıhologııalyq kózqarasy óte mańyzdy. Ana neǵurlym sabyrly bolsa, bala soǵurlym senimdi bolady. Sondaı-aq bul jerde balanyń psıhoemotsıonaldy jaǵdaıyn qaraý kerek.

– Suhbatyńyzǵa rahmet!