Jasóspirimderdi esirtkige eliktirgenderdi taýyp, jazalaý jaǵy jetkiliksiz - Prokýratýra

ASTANA. QazAqparat - Búgin Astana qalasy ákimdiginde Prokýratýra janyndaǵy zańdylyqty qamtamasyz etý jónindegi qoǵamdyq keńestiń otyrysynda qala prokýrorynyń kómekshisi Rýslan Áıtimov polıtsııa qyzmetkerlerin «jasóspirimderdi esirtkige eliktirgenderdi tabýǵa qulyqsyz bolyp otyr», dep aıyptady.

«Esirtkige qatysty esepte Astana qalasy boıynsha kámelettik jasqa tolmaǵan 71 bala tirkeýde tur. Alaıda, bul faktilerdiń bir de bireýi boıynsha tergeýge deıingi tekserýler tııanaqty júrgizilmegen. Jasóspirimderdiń qalaısha nashaqor bolǵany, olardy bul jolǵa kimder eliktirgeni áli de eshqalaı anyqtalmaǵan», - deıdi R. Áıtimov.

Bul rette prokýratýra ókili qalalyq ishki ister basqarmasyna qarasty Esirtkimen kúres jónindegi basqarmanyń «senim telefony» qyzmeti de tıimdilik tanytpaı otyrǵanyn atap ótti. Onyń aıtýnysha, 2015 jyly «senim telefony» jelisine barlyǵy 28 qońyraý kelip túsken, sonyń ishinde úsheýi tekserilse, qalǵan 24-i boıynsha aqparattar áli kúnge naqtylanbaǵan.

«Halyqqa «senim telefony» qyzmeti týraly aqparat ta durys jetkizilip jatqan joq», - dedi R. Áıtimov.