Jasóspirimderdi áskerı ýchaskelerge tirkeý aıaqtaldy - QR Qorǵanys mınıstrligi

ASTANA. QazAqparat - Qazaqstan Respýblıkasynda azamattardy áskerı shaqyrý ýchaskelerine tirkeý aıaqtaldy. Bıyl qańtar aıy men naýryz aıy aralyǵynda 1998 jyly týylǵan qazaqstandyq jastar tirkeldi.

«Osy ýaqyt aralyǵynda Qazaqstan boıynsha «Áskerı qyzmet jáne áskerı qyzmetshilerdiń mártebesi týraly» Qazaqstan Respýblıkasy Zańynyń 16-babyna sáıkes áskerge shaqyrý ýchaskelerine 100 000-ǵa jýyq adam tirkeldi. Bul is-sharany tıisti qorǵanys isteri jónindegi basqarmalar arqyly jergilikti atqarýshy organdar ótkizdi. Tirkeý naýqany aıasynda azamattar áskerı esepke alynyp, aldaǵy ýaqytta ásker qataryna shaqyrylýshylardyń sany anyqtalady», delingen QR Qorǵanys mınıstrligi baspasóz qyzmetiniń málimetinde.

Sonymen qatar jastardyń bilimi, mamandyǵy, dene daıarlyǵyna qaraı otyryp, áskerı qyzmetke jaramdylyǵy belgili bolady. Jasóspirimder medıtsınalyq tekserýden ótip, emdelýdi nemese medıtsınalyq baqylaýdy qajet etetin jastar emdeý-saýyqtyrýdan ótedi.

Atap aıtqanda, densaýlyq jaǵdaıy jáne basqa da málimetter boıynsha jaramdy dep tanylǵan áskerge shaqyrylýshylarǵa áskerı oqý oryndarynda, Qorǵanys mınıstrliginiń arnaıy uıymdarynda oqý usynyldy. Bul jerde balalar úıleri men mektep-ınternattardyń tárbıelenýshileri, kóp balaly turmystyq jaǵdaıy tómen otbasylar erekshe nazarda bolmaq.