Jasóspirimder tarapynan jasalatyn qylmystar quqyq qorǵaý organdaryn erekshe alańdatyp otyr - Q.Mámı

Soǵan qaramastan kámeletke tolmaǵandardyń arasyndaǵy qylmystyq jaǵdaı elimizdiń kóptegen aımaqtarynda kúrdeli kúıinde qalyp otyr. Bul týraly búgin Astanada ótken Qazaqstan Respýblıkasynyń quqyq qorǵaý organdarynyń úılestirý keńesiniń kezekti otyrysynda Bas prokýror Qaırat Mámı málim etti, dep habarlaıdy QazAqparat.

Bas prokýrordyń sózine qaraǵanda, qazir jasóspirimderdiń jekelegen tulǵalarǵa zorlyq-zombylyq túrindegi qylmystardy jasaý áreketteri erekshe alańdaýshylyq týdyryp otyr. Sonymen qatar olar tarapynan jasalatyn kisi óltirý, tonaý, qaraqshylyq áreketteri de jiti nazar aýdarýdy qajet etedi. «Buǵan qosa elimizde jasóspirimderden uıymdasqan qylmystyq toptardyń paıdasyna aqsha bopsalaý áreketteriniń jıilep ketkendigi jóninde turǵyndardan kóptep aryzdar men shaǵymdar túsip jatyr. Mundaı faktiler ásirese Taraz qalasyndaǵy jáne ózge de aımaqtardaǵy oblys ortalyqtaryndaǵy mektepterde kóptep oryn alyp otyr», dedi Q.Mámı.

Onyń aıtýynsha, atalmysh sala boıynsha arnaıy júrgizilgen Bilim jáne ǵylym mınıstrliginiń zertteýlerine qatysqan jasóspirimderdiń

6 paıyzy ózderinen aqsha bopsalanǵanyn, 26 paıyzy ózderiniń qurbylarynyń dóreki áreketterinen qurbany bolǵandaryn jáne 22 paıyzy ózderine ózgeler tarapynan zorlyq-zombylyq kórsetilgenin atap ótken. «Eń qorqynyshtysy, jasóspirimder tarapynan jasalatyn zańsyz áreketter ádette qarýdy qoldaný arqyly júzege asyrylady. Mysaly, Ońtústik Qazaqstan oblysynda ótken jyly kámeletke tolmaǵan jasóspirimder atys qarýynyń kómegimen 6 ret kisi óltirgen. Al Shymkent qalasynda joǵary synyp oqýshylary qalanyń ortasynda ashyq kúnde sholaq myltyqpen atysqan. Nátıjesinde 1 jasóspirim aýyr jaraqat alyp, osy aradan ótip bara jatqan eki jasóspirim qyzdar zardap shekti», dedi Bas prokýror.

Osyǵan qaraı ol búgingi otyrysta kámeletke tolmaǵandarǵa qatysty osy jáne ózge de máselelerdi talqyǵa salyp, qalyptasqan jaǵdaıdy túbegeıli ózgertetin tıisti sheshimder qabyldaý qajettigin atap kórsetti.