Jasóspirimder olımpıadasynda qazaqstandyq sportshylar óz rekordyn jańartty
ASTANA. QazAqparat - Qazaqstandyq jas sportshylar Býenos-Aıreste Jasóspirimder olımpıadasy tarıhynda óz rekorttaryn jańartty, dep habarlaıdy QazAqparat.
Bıyl úshinshi márte ótken tórtjyldyq dodada otandastarymyz 4 altyn, 3 kúmis, 3 qola (10) medalmen jalpy komandalyq esepte 15-shi orynǵa ıe boldy. Bul jasóspirimderimizdiń Olımpıada oıyndaryndaǵy ázirge eń joǵarǵy jetistigi.
Aıtalyq, eń alǵashqy Jasóspirimder olımpıadasy 2010 jyly Sıngapýrde ótti. Atalǵan álemdik dodaǵa sporttyń 17 túrinen 47 qazaqstandyq sportshy qatysqan bolatyn. Onda sportshylarymyz Qazaqstan qorjynyna 2 altyn, 2 kúmis jáne 2 qola medal salyp, jalpy esepte 18-shi orynnan kóringen edi.
Al araǵa tórt jyl salyp, ıaǵnı 2014 jyly ekinshi Jasóspirimder olımpıadasy Qytaıdyń Nankın qalasynda ótti. Oǵan álemniń 201 memleketinen eń tańdaýly sportshylar baq synady. Nankındegi ІІ jasóspirimder olımpıadasyna Qazaqstannan 51 sportshy 17 sport túrinen saıysqa tústi. Nátıjesinde el qorjyny 3 altyn, 1 kúmis jáne 4 qola medalmen tolyǵyp, jalpy esepte 21-shi orynǵa taban tiredi.
Mine, bıyl 4 altyn, 3 kúmis, 3 qola (10) medalmen alǵash ret alǵashqy 15 eldiń qataryna kirdi.
Bıylǵy Olımpıadada alǵashqy altyn medaldi dzıýdoshy Bekarys Sádýaqas saldy. Ol erler arasynda 100 kelige deıingi salmaq dárejesinde qarsylas shaq keltirmeı, olımpıada chempıony atandy. Ekinshi altyndy kanoe esýden Dıas Bahrıddın jeńip alsa, úshinshi altynǵa velosporttan Qazaqstan erler komandasy qol jetkizdi. Al tórtinshi bas júldeni boksshy Aıbek Oralbaı jeńip aldy.
Úsh kúmistiń birin dzıýdodan áıelder arasynda 78 keli salmaqta synǵa túsken Margarıta Grıtsenko qanjyǵasyna baılasa, ekinshi jáne úshinshi kúmis júldeni boksshylar Damır Toıbaı men Talǵat Shaıken qanjyǵasyna baılady.
Al úsh qola medaldiń alǵashqysyn baıdarka esýden Stella Sýhanova jeńip aldy. Ekinshi qola medalǵa bokstan áıelder arasynda synǵa túsken Nadejda Rıabets ıe bolsa, úshinshi sońǵy qola medal jarystyń sońǵy kúni karetashy Ábilmansur Batyrǵalıǵa buıyrdy.
Bıylǵy Býenos-Aıreste ótken Jasóspirimder olımpıadasynda Reseı quramasy top jardy. Olardyń enshisinde 29 altyn, 18 kúmis, 12 qola (59) medal bar. Ekinshi orynǵa 18 altyn, 9 kúmis, 9 qola (36) medal ıelengen qytaı sportshylary jaıǵasty. Úzdik úshtik 15 altyn, 12 kúmis, 12 qola (39) medal enshilegen japonııalyqtarǵa buıyrdy.
Aıta keteıik, ІІІ Jazǵy jasóspirimder olımpıadasy 6-18 qazan aralyǵynda ótti. Oǵan 206 memleketten 4 myń sportshy qatysty. Jarystar baǵdarlamasyna sporttyń dástúrli 28 túrinen bólek, sporttyq bıler (breık-dans), karate, taýǵa órmeleý, rolıkpen syrǵanaý qosyldy.
Baıraqty dodada el namysyn 58 sportshy qorǵady.
