Jasóspirimder olımpıadasy: Qazaqstan qandaı jetistikterdi baǵyndyrdy

ASTANA. QazAqparat - Argentına astanasyndaǵy jasóspirimder olımpıadasynyń bastalýyna sanaýly kúnder qaldy. Tarıhta úshinshi ret ótkeli otyrǵan Olımpıada oıyndarynan Qazaqstan quramasy altynsyz oralǵan emes. Bul týraly QazAqparat Olympic.kz-ke silteme jasap habarlaıdy.

Eń alǵashqy Jasóspirimder Olımpıadasy 2010 jyly Sıngapýrde ótti. Atalǵan álemdik dodaǵa sporttyń 17 túrinen 47 qazaqstandyq sportshy qatysqan bolatyn.

Qazaqstan quramasy 2 altyn, 2 kúmis jáne 2 qola medalmen jalpy esepte 18-shi orynnan kórindi. 

Grek-rım kúresiniń sheberi Jánibek Qandybaev pen ziltemirshi Jazıra Japarqul qazaq eliniń kók baıraǵyn tuńǵysh ret jasóspirimder Olımpıadasynda jelbiretken edi. Keıin chempıon da sport áleminen óz ornyn taýyp, Jazıra Rıo Olımpıadasynyń kúmis júldegeri atandy. Al Jánibek Qandybaev eresekter arasyndaǵy dúnıejúzilik syndarǵa qatysyp júr. 

Taǵy bir sportshymyz, dzıýdoshy Qaırat Aǵybaev aralas komandalyq synd chempıondyq ataqqa qol jetkizdi. Biraq bul altyn Qazaqstan esebine jazylǵan joq. 

Kúmis júldeni taekvondoshy Nursultan Mamaev pen aýyr atlet Zúlfııa Chınshanlo ıelendi. Mamaev búginde taekvondodan ulttyq qurama úzdikteriniń birine aınaldy. Al Chınshanlo álem chempıonattarynda top jardy. 

2010 jylǵy Olımpıadanyń qola júldegerleri qatarynda «klassık» Aqan Baımaǵambetov pen aýyr atlet Rústem Sybaı bar. Rústem eresekter arasyndaǵy ulttyq quramaǵa jıi shaqyrtý alady. 

2014 jylǵy jasóspirimder Olımpıadasyn Qytaıdyń Nankın qalasy qabyldady. 201 memlekettiń arasynan Qazaqsan sportshylary jalpy esepte 21-shi orynǵa taban tiredi. 

Bizdiń sportshylar Nankın tórinen 3 altyn, 1 kúmis jáne 4 qola medal enshilegen edi. 

Altyn júldeni boksshy Abylaıhan Júsipov, dzıýdoshy Baýyrjan Jaýyntaev jáne erkin kúres sheberi Qýatbek Muhambetov jeńip aldy. 

Abylaıhan Júsipov eresekter arasyndaǵy ulttyq qurama sapynda Azııa jáne álem chempıonattarynda, sondaı-aq, Olımpıada oıyndaryna qatysqan tájirıbeli boksshy atandy. 

Baýyrjan Jaýyntaev ta dzıýdodan iri álemdik týrnırlerge qatysyp júr.

Kúmis júldeni boksshy Vadım Kazakov, qola medaldi Evgenıı Polıvadov (grek-rım kúresi), Jasulan Qalıev, Tatıana Kapýstına (aýyr atletıka) jáne kórkem gımnastıkadan Qazaqstan komandasy ıelendi. 

Bıylǵy jasóspirimder Olımpıadasynda sporttyń 22 túrinen 57 qazaqstandyq atlet attandy. Jas sportshylardan biz tolaǵaı tabys kútemiz. 

Eske sala keteıik, buǵan deıin biz Qazaqstandyq sportshylar jasóspirimder Olımpıadasyna attanǵandyǵy týraly habarlaǵan bolatynbyz.