Jasóspirimder koronavırýs vaktsınasyn qalaı qabyldaıdy

ALMATY. QazAqparat - Almaty pedıatry jasóspirimderdiń COVID-19-ǵa qarsy vaktsınany jaqsy qabyldaıtynyn aıtty, dep habarlaıdy QazAqparat tilshisi.

№7 Qalalyq klınıkalyq aýrýhananyń pedıatr dárigeri Qarlyǵash Baıdýllanyń aıtýynsha, vaktsınatsııa jasóspirimder men júkti áıelderdiń ımmýnıtettin nyǵaıtady. Sondyqtan ata-analar balalardy qazir vaktsınalaýy kerek.

Dáriger buryn belgili bolǵan barlyq indetter vaktsınatsııa arqyly toqtatylǵanyn eske saldy. «Keıbir ata-analar balalardyń ımmýnıteti kúshti dep sanaıdy. Alaıda, bul jynystyq jetilý jasyndaǵy jasóspirimderde qıynyraq. Birinshiden, olar sanıtarlyq talaptardy jıi elemeıdi, ekinshiden, olardyń aǵzasy áldeqaıda jetilgen, ıaǵnı vırýspen ózara árekettesýdiń barlyq mehanızmderi uqsas», - deıdi ol.

Sondaı-aq spıker koronavırýstyń tórtinshi tolqyny kezinde qalada aýrýdyń «jasarýy» baıqalǵanyn, aýrýhanaǵa kóbine balalar túskenin tilge tıek etti.

Qarlyǵash Baıdýlla fızıologııanyń erekshelikterine baılanysty júkti áıelderdi vaktsınatsııalaý qajettiligi týraly aıtty.

«Munda eki maqsat bar: anany jáne balany qorǵaý. COVID-19-ǵa qarsy egý qaýipsiz. Biraq aýrýdyń ózi birqatar asqynýǵa ákeledi, sonyń ishinde koagýlopatııa, qan uıýynyń buzylýy, uryqtyń antenataldy ólimine, platsentarly bólinýge jáne qan ketýge ákeletin qan uıyǵyshtarynyń joǵarylaýy. Vaktsınany 2-shi jáne 3-shi trımestrde alýǵa bolady, osy kezeńde vaktsınanyń uryqqa áseri joq, ol qazirdiń ózinde qalyptasqan», - dep túsindirdi dáriger.

Sondaı-aq Qarlyǵash Baıdýlla vaktsınalanǵan almatylyqtardy revaktsınatsııaǵa shaqyrdy. Onyń aıtýynsha, antıdeneler belgili bir ýaqyttan keıin kúshin joǵaltady. Sondyqtan úshinshi vaktsınany alý usynylady. Revaktsınatsııadan ótý kezinde basymdyq qart adamdarǵa, sozylmaly aýrýlary bar adamdarǵa berilýi kerek.

«Mysaly, organızmdegi eki komponentpen vaktsınatsııadan keıin antıdeneler sany 1 000-nan 5 000 birlikke deıin jetedi, biraq jarty jyldan keıin olardyń sany azaıady. Eger aǵzada antıdeneler bolmasa, onda adam vırýsty tez juqtyrady. Al revaktsınatsııa – bul aǵzaǵa jańa antıdenelerdiń qosylýy», - dep túıindedi dáriger.