Jasóspirimder arasynda qazaq kúresinen respýblıkalyq týrnır ótti
QYZYLORDA. QazAqparat-Shıeli aýdanynyń Eńbekshi aýylynda Ekinshi dúnıejúzilik soǵysynyń jáne eńbek ardageri Baıtiles Júsipulyn eske alýǵa arnalǵan qazaq kúresinen jasóspirimder arasynda respýblıkalyq týrnır ótti, dep habarlady QazAqparat HAA.
Aýdan ákimdiginen málim etkendeı, jarysqa Qyzylorda qalasy men Syr boıynyń barlyq aýdandarynan jáne kórshi Jambyl, Ońtústik Qazaqstan oblystarynyń palýandary qatysty.
«Týǵan jer» baǵdarlamasyna saı uıymdastyrylǵan sharany Shıeli aýdany ákiminiń orynbasary Almasbek Esmahanov ashyp, sportshylarǵa sáttilik tiledi. Sondaı-aq, Baıtiles qarııanyń uly, belgili qalamger, respýblıkalyq «Aıqyn» gazetiniń bas redaktory Nurtóre Júsip sóz sóılep, jarysty uıymdastyrýshylarǵa rızashylyq sezimin bildirse, eńbek ardageri Esirkep Shádibekov te qazaqtyń altyn besigi aýyldy kóterý turǵysyndaǵy osyndaı sharalardyń kóp qoldaýyna ıe bolatyndyǵyn jetkizdi.
Týrnır qortyndysynda jeńimpazdarǵa syılyqtar tapsyryldy.
