Jasóspirim vaktsına alǵanda ata-anasy janynda bola alady – dáriger

NUR-SULTAN. QazAqparat – Búgin elimizde jasóspirimder, júkti áıelder jáne bala emizetin analar vaktsına ala bastady. Osy oraıda jasópirim ekpe saldyrǵanda janynda ata-anasy bolyp, jaǵdaıdy baqylaı alady. Bul týraly Nur-Sultan qalasy №2 densaýlyq saqtaý ortalyǵynyń meńgerýshisi, dáriger Gúlmıra Dúısembaeva málim etti, dep habarlaıdy QazAqparat tilshisi.

«Bizdiń emhanadan Pfizer vaktsınasyn júkti áıelder, emizýli balasy bar analar jáne 12 men 17 jas aralyǵyndaǵy jasóspirimder ala alady. Ekpe saldyrmas buryn patsıent medıtsınalyq tekserýden ótedi. Dáriger vaktsına alýshynyń dene temperatýrasyn tekserip, oǵan nusqaýlyq beredi. Jáne vaktsınanyń áseri aldyn ala túsindiriledi. Bireýdiń ystyǵy kóteriliýi múmkin nemese ekpe salǵan jer aýyrsynyp jatady. Vaktsına alǵan patsıent jarty saǵat boıy mamandardyń baqylaýynda bolady. Odan keıin, terapevt dáriger 3 kún boıy baılanysta bolady. Eger vaktsına alǵan adam ózin jaısyz sezinse dárigerdiń kómegine júgene alady», - dedi Gúlmıra Dúısembaeva.

Sondaı-aq, dáriger óziniń 16 jastaǵy qyzyna vaktsına alýǵa ruqsatyn beretinin aıtty.

«Balalar kópshilik orynda júredi jáne kóbisi shetelge oqýǵa túskisi keledi. Sondyqtan da vaktsına alǵan jón dep sanaımyn. Onyń ústine qazirgi jasóspirimder óte saýatty olarǵa kóp dúnıe aıtyp túsindirip jatýdyń qajeti az. Olar ózderi-aq oqyp, bilip alady. Ata-ana retinde bizdiń maqsat – baǵyt-baǵdar berý, keńes aıtý. Búgin túske deıin Pfizer vaktsınasynyń 2 flakony ashyldy. Demek 12 adam koronavırýsqa qarsy ekpe aldy. Ázirge eshkimnen keri áser baıqalmady. Bizdiń mamandar da vaktsına salýǵa qatysty biliktiligin jetildirý kýrsynan ótti. Jasóspirim vaktsına alǵanda ata-anasy qasynda bola alady. Jaǵdaıdy óz kózimen kórýine bolady», - deıdi ol.

Aıta keteıik, búgin elordada Pfizer vaktsınasyn salý protsesi bastaldy. Ekpeni alǵash bolyp 17 jastaǵy astanalyq jasóspirim salǵyzdy.

Sondaı-aq, emizetin balasy bar elordalyq ana da ekpeden keıingi áserimen bólisken bolatyn.

Odan bólek, qalalyq qoǵamdyq densaýlyq saqtaý basqarmasynan vaktsına alǵysy keletin júkti áıelder men emizýli analardyń qatary kóp ekeni habarlandy.