«Jasóspirim» sharasy barysynda kámeletke tolmaǵan 2 myńǵa tarta bala ishimdik ishkeni úshin ustaldy
ASTANA. 29 aqpan. QazAqparat - Aǵymdaǵy jylǵy 25 aqpanda Іshki ister mınıstrliginiń bastamasy boıynsha júzege asqan «Jasóspirim» aldyn alý sharasy júzege asty.
Shara barysynda kámeletke tolmaǵan 2 myńǵa tarta bala qoǵamdyq oryndarda ishimdik ishkeni úshin ustalyp, olar ishki ister organdaryna jetkizildi. Bul týraly búgin Іshki ister mınıstrliginde ótken dástúrli baspasóz máslıhaty barysynda vedomstvonyń resmı ókili Nurdildá Oraz málim etti.
Sharanyń maqsaty jasóspirimder arasyndaǵy qylmystyń aldyn alý jáne jolyn kesý, kámeletke tolmaǵandarǵa alkogol ishimdikterin, temeki ónimderin satý faktilerin anyqtaý bolyp tabylady. Bunymen qosa túngi ýaqytta kóńil kóterý oryndarynda, turǵyn úı-jaılardan tys jerlerde zańdy ókilderinsiz, qadaǵalaýsyz júrgen balalardy anyqtap, jastardyń quqyqtyq saýattylyǵyn arttyrýǵa járdemdesý kózdelgen.
«Keshendi jedel-aldyn alý sharasy barysynda ishki ister organdaryna 7 myńnan asa kámeletke tolmaǵandar jetkizildi. Onyń ishinde 4 myńǵa jýyǵy ákimshilik quqyq buzǵan bolsa, 1973-i qoǵamdyq oryndarda alkogoldik ishimdik ishkenderi úshin ustalǵan. Bala tárbıesi mindetin atqarmaǵany úshin 800-ge jýyq ata-ana, kámeletke tolmaǵandy ishimdik ishýge ıtermelegeni úshin 44 eresek ákimshilik jaýapkershilikke tartyldy. Kámeletke tolmaǵandardy qylmystyq is-áreketterge tartý faktisi boıynsha 8 qylmystyq is qozǵaldy», - deıdi N. Oraz. Onyń aıtýynsha, shara barysynda mektepterde men lıtseılerde, gımnazııalarda quqyq taqyrybyna arnalǵan 11 myńnan asa dárister, áńgimelesýler jáne dóńgelek ústelder ótkizilgen.
