Jasóspirim mektep formasyn alýǵa ájesi bergen aqshamen joǵalyp ketken
ÓSKEMEN. QazAqparat – Óskemen qalasynyń turǵyndary bir aptada joǵalǵan 3 balany tapty, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, birneshe kún buryn «102» jedel arnasyna 62 jastaǵy zeınetker júginip, nemeresin izdeýge kómektesýdi suraǵan. Qart áıel nemeresine mektep formasyn alý úshin 20 myń teńge beripti. Alaıda aqshany alyp syrtqa shyqqan 15 jastaǵy jasóspirim joǵalyp ketken. Bul oqıǵadan kóp ýaqyt ótpesten qalalyq mamandandyrylǵan jasóspirimder úıiniń tárbıeshisinen 2006 jyly týǵan tárbıelenýshi dosy kelgen soń aýlaǵa shyǵyp ketkeni, sodan oralmaǵany týraly habar túsken.
«Joǵalǵan eki balanyń dos ekeni belgili boldy. Sol kúni olar kezdesýge kelisken. Іzdestirý barysynda polıtseıler ekeýin tanysynyń úıinen tapty. Anyqtalǵandaı, 15 jastaǵy jasóspirim ájesiniń bergen aqshasyn dosymen birge jumsap tastaǵan. Sodan soń jasóspirimder tanys qyzdyń úıine qonaqqa barýdy sheshken. Qyzdyń anasy polıtsııaǵa qońyraý shalyp, joǵalǵan balalar óz úıinde ekenin jetkizdi», - dep habarlady baspasóz qyzmetinen.
Sondaı-aq 24 tamyz kúni «102» jedel arnasyna 27 jastaǵy jergilikti turǵyn habarlasqan. Óz sózinde ol kámeletke tolmaǵan ulynyń joǵalyp ketkenin jetkizdi.
7 jasar bala úıinen shyǵyp ájesine ketken. Biraq ájesiniń úıine jetpeı, iz-túzsiz joǵaldy. Anasy ulyn óz betinshe tabýǵa tyrysqanymen odan esh nátıje shyqpaǵan. Barlyq tanystary men dostaryna qońyraý shalsa da balasynyń qaıda ekenin bile almaǵan.
Habar túsisimen jedel-izdestirý toby men polıtsııa basqarmasynyń barlyq jeke quramy dereý jınaldy. Tártip saqshylary irgeles jatqan aýmaqtardy, atap aıtqanda saıabaqtardy, jastar jınalatyn oryndardy, dámhanalardy, turǵyn úılerdiń kireberisterin muqııat aralap shyqqan.
«Qabyldanǵan sharalardyń nátıjesinde sol kúni polıtsııa qyzmetkerleri joǵalǵan balany Tıhaıa kóshesindegi Úlbi ózeniniń jaǵasynan tapty. Anyqtalǵandaı, bala ájesine kelgende úıde eshkim bolmaǵan. Sodan keıin ol kóshede oınap júrgen balalarmen birge jaǵalaýǵa serýendep ketken», - deıdi qalalyq PB bastyǵy Andreı Mýla.
