Jasóspirim qyzdar júrip kele jatqan poıyzǵa sekirip mingen
ASTANA. QazAqparat - Zaşıta stansasynyń ishki ister jelilik bólimshesiniń qyzmetkerleri júrip kele jatqan júk poıyzynyń vagonyna sekirip mingen 3 jasóspirimdi ustady, dep habarlaıdy QazAqparat.
Kóliktegi ishki ister departamenti baspasóz qyzmetiniń málimetinshe, tosyn oqıǵa «Jańa Óskemen» stansasynyń jumys parkinde bolǵan.
«Quqyq buzǵan 11-12 jastaǵy qyzdar Zaşıta stansasynyń ishki ister jelilik bólimshesine jetkizilip, sol jerde olar júrip kele jatqan júk poıyzyna serýendeý maqsatynda sekirip mingendigi anyqtaldy. Olarmen ata-analarynyń qatysýmen aldyn alý áńgimelesýi júrgizildi», - delingen taratylǵan aqparatta.
Vedomstvo málimetinshe, osy jyldyń basynan beri Kóliktegi ishki ister departamentiniń jáne onyń jelilik bólimsheleriniń ákimshilik polıtsııa qyzmetkerleri temir joldy belgilenbegen jerden kesip ótkeni úshin 9799 adamdy ákimshilik jaýapkershilikke tartqan. Sonymen qatar júk jáne jolaýshylar poıyzdarynyń 354 ret shuǵyl tejegishti iske qosqany tirkelgen. Onyń 184-i adamdardyń, 142-si maldardyń jol boıynda bolýy sebep.
Joǵaryda atalǵan zań buzýshylyqtardyń aldyn alý maqsatynda depýartament qyzmetkerleri osy jyldyń ótken kezeńi ishinde 430 ret kezendi reıdtik sharalar ótkizip, 173 ret halyqpen jıyn ótkizdi.
«Jedel aldyn alý jumystarynyń júrgizilgendigine qaramastan temir jol nysandarynda qaýipsizdik sharalaryn saqtamaý faktileri jalǵasýda. Kólik polıtsııasy temir jol qaýiptiligi joǵary nysan ekendigin eskertedi», - dep atap ótedi vedomstvodan.
Foto: mobilmusic.ru
