«Jasóspirim»: Almaty oblysynda bir táýlikte 250 ákimshilik quqyq buzýshylyq anyqtaldy
TALDYQORǴAN. QazAqparat - Almaty oblysynyń polıtseıleri aqpan aıynyń 22-26 kúnderi oblys aýmaǵynda «Jasóspirim» jedel aldyn alý is-sharasyn júrgizýde, dep habarlaıdy QazAqparat tilshisi.
Arnaıy sharanyń basty maqsaty – jasóspirimder arasyndaǵy quqyq buzýshylyq pen qylmystardyń aldyn alý, olardyń quqyǵyn qorǵaý.
«Atalǵan sharanyń alǵashqy kúni 250 ákimshilik quqyq buzýshylyq anyqtadyq. Túsindirý jumystaryn júrgizip, tıisti ákimshilik hattama toltyrý úshin 225 jasóspirim ishki ister organdaryna jetkizildi. Onyń ishinde kámilettik jasqa tolmaǵan balanyń túngi mezgilde úıinen tys jerde jeke júrýi, olardyń oıyn-saýyq oryndaryna barýy, olarǵa temeki jáne ishimdik ónimderin satý jáne taǵy basqa derekteri bar. Bala tárbıesine atústi qaraǵan 23 adamǵa hattama toltyrylyp, aıyppul salyndy. 6 jasóspirim ýaqytsha beıimdeý ortalyǵyna jetkizildi»,- dedi oblystyq PD JPQB aǵa ınspektory polıtsııa podpolkovnıgi Medet Qunanbaev.
Tártip saqshylary 29 is materıaldaryn balalar quqyǵyn qorǵaıtyn arnaıy komıssııanyń qaraýyna usynǵan. 38 jasóspirim men 27 qolaısyz otbasy arnaıy esepke qoıylyp, baqylaýǵa alyndy.
Polıtsııa ókiliniń aqparaty boıynsha, alǵashqy kúni quqyq qorǵaýshylar 315 kóńil kóterý ornyn teksergen. Olardyń qatarynda meıramhanalar men kafeler, kompıýterlik klýbtar, saýda oryndary jáne jertólede ornalasqan túrli oıyn-saýyq mekemeleri bar.
