Jasóspirim ákesiniń keshigýine baılanysty poıyzdyń toqtatý kranyn julyp alǵan
QR ІІM Kóliktegi polıtsııa departamentiniń baspasóz qyzmeti málim etkenindeı, oqıǵa Atbasar stantsııasynda «Nur-Sultan-Arqalyq» jolaýshylar poıyzyn jóneltý kezinde boldy.
«13 jasar balanyń ákesi poıyz toqtap turǵan kezde shyǵyp, qaıta oralýǵa úlgermeı qalǵan. Qoryqqan jasóspirim temirjol kóligin toqtatý úshin krandy julyp alǵan», dedi Kóliktegi polıtsııa departamenti bastyǵynyń birinshi orynbasary, polıtsııa polkovnıgi Qalıjan Qoblandın.
Onyń sózine qaraǵanda, balanyń ákesine qatysty QR Ákimshilik quqyqbuzýshylyq kodeksi 560-babyna (temirjol kóligi quraldaryn paıdalaný erejesin buzý) sáıkes 5 AEK kóleminde aıyppul salyndy.
«Jyl basynan beri departamentte poıyzdy shuǵyl tejeýdiń 367 deregi tirkelgen bolsa, sonyń 12-si toqtatý kranyn julyp alýǵa baılanysty», dedi Q.Qoblandın.