Jaslan Mádıev: WAICO-ǵa qosylý – Qazaqstan úshin strategııalyq qadam
ASTANA. KAZINFORM — Kelisimge barlyǵy 29 eldiń, sonyń ishinde Qazaqstannyń, QHR-dyń, Katardyń, Egıpettiń jáne Brazılııanyń ókilderi qol qoıdy.
Memleket basshysynyń Qytaı Halyq Respýblıkasyna resmı sapary aıasynda Qazaqstan Jasandy ıntellekt salasyndaǵy yntymaqtastyq jónindegi dúnıejúzilik uıymnyń — WAICO-nyń quryltaıshy memleketteriniń qataryna resmı túrde kirdi. Kelisimge barlyǵy 29 eldiń, sonyń ishinde Qazaqstannyń, QHR-dyń, Katardyń, Egıpettiń jáne Brazılııanyń ókilderi qol qoıdy. Saltanatty rásimge BUU Bas hatshysy Antonıý Gýterrısh, sondaı-aq basqa da memleketter men halyqaralyq uıymdardyń ókilderi qatysty.
Tarıhı sheshim «Jarqyn bolashaq jolyndaǵy jasandy ıntellekt salasyndaǵy seriktestik» uranymen ótip jatqan Jasandy ıntellekt jónindegi dúnıejúzilik konferentsııa jáne JI-di jahandyq basqarý boıynsha joǵary deńgeıdegi keńes (WAIC-2026) aıasynda qabyldandy. Shtab-páteri Shanhaıda ornalasqan jańa halyqaralyq qurylymnyń qurylýy tsıfrlyq tehnologııalar salasyndaǵy jahandyq ózara is-qımyldyń sapaly jańa deńgeıge kóshkenin bildiredi.
«Jasandy ıntellekt salasyndaǵy yntymaqtastyq jónindegi dúnıejúzilik uıymdy qurý týraly» kelisimge qol qoıý rásimi Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıevtiń jáne QHR Syrtqy ister mınıstri Van I-diń qatysýymen ótti.
Konferentsııanyń ashylý saltanaty barysynda uıymnyń qurylǵany resmı túrde jarııalandy, bul jahandyq tsıfrlyq teńsizdikti eńserýge jáne tehnologııalardy basqarýdyń ádil erejelerin qalyptastyrýǵa baǵyttalǵan bastamalardy iske asyrýdaǵy mańyzdy qadam boldy.
Qol jetkizilgen ýaǵdalastyqtarǵa sáıkes, uıymnyń qyzmeti BUU Jarǵysynyń maqsattary men qaǵıdattaryna negizdeledi. Taraptar keń aýqymdy konsýltatsııalar, birlesken úles jáne ózara tıimdilik qaǵıdattaryn ustanýǵa, sondaı-aq adam múddesine baǵdarlanýǵa kelisti.
— Qazaqstannyń WAICO-ǵa jáne Jasandy ıntellekt salasyndaǵy yntymaqtastyq jónindegi dúnıejúzilik uıymdy qurýǵa qatysýy biz úshin strategııalyq mańyzǵa ıe. Álem tehnologııalyq damýdyń jańa kezeńine aıaq basýda, onda JI kezindegi ınternet nemese elektr energııasy sııaqty bazalyq ınfraqurylymǵa aınalyp otyr. Búginde memleketter tehnologııalar úshin ǵana emes, talant, esepteý qýattary men derekter, sondaı-aq JI-di damytýdyń halyqaralyq erejelerin qalyptastyrýǵa qatysý múmkindigi úshin de básekege túsýde, — dep atap ótti Jaslan Mádıev.
Jaslan Mádıev sonymen qatar, uıymǵa kirý Memleket basshysynyń tapsyrmasy boıynsha elde júrgizilip jatqan júıeli jumystyń zańdy kezeńi ekenin basa aıtty. Sońǵy jyldary Qazaqstanda tolyqqandy AI-ekojúıesi qalyptasty: jasandy ıntellekt týraly beıindi zań qabyldandy, Prezıdenttiń tóraǵalyǵymen JI jónindegi keńes jumys isteıdi, óńirdegi eń qýatty sýperkompıýter paıdalanýǵa berildi, qýaty 1 GVt-qa deıingi Data Center Valley jobasy iske asyrylýda, ulttyq tildik modelder jasaldy jáne Alem.AI halyqaralyq ortalyǵy tabysty jumys isteýde.
Aıta keter bolsaq, QHR JI-di qaýipsiz jáne etıkalyq turǵydan paıdalaný jónindegi jahandyq suranysqa jaýap retinde WAICO-ny qurýǵa bastamashylyq etti. WAICO-nyń basty maqsattary retinde, halyqaralyq yntymaqtastyq pen jahandyq basqarýdy damytýdy, JI tehnologııalarynyń paıdaly, qaýipsiz jáne ádil bolýyn qamtamasyz etýdi, sondaı-aq olardyń búkil adamzat ıgiligi úshin salaýatty, rettelgen damýyna járdemdesýdi aıqyndady.
Qazaqstannyń jańa halyqaralyq qurylymǵa qatysýy elimiz úshin quzyrettermen almasý, ınvestıtsııalar tartý jáne ozyq tehnologııalyq sheshimderdi birlesip ázirleý úshin jol ashpaq, bul respýblıkanyń jahandyq tehnologııalyq arhıtektýranyń negizgi qatysýshysy jáne «Adam ıgiligi úshin JI» bolashaǵyn qalyptastyrýdaǵy senimdi seriktes retindegi mártebesin aıǵaqtaıdy.
