Jaslan Mádıev sheteldik ınvestorlarǵa Qazaqstannyń tsıfrlyq bastamalaryn tanystyrdy
ASTANA. KAZINFORM — Qazaqstan álemdik deńgeıdegi tsıfrlyq ınfraqurylymdardy quryp jatyr. Bul jóninde QR Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev QR Prezıdenti janyndaǵy sheteldik ınvestorlar keńesi otyrysynda málimdedi.
Onyń sózinshe, elimizdiń bastamalary jahandyq tehnologııalyq ınvestorlarǵa jańa múmkindikter beredi.
— Qazaqstandaǵy óte mańyzdy ınfraqurylymdyq jobalardyń biri — Transkaspıı talshyqty-optıkalyq dálizi. Kaspıı teńizi arqyly ótetin alǵashqy sýasty talshyqty-optıkalyq kabel bıyl jyl sońynda daıyn bolyp, Eýropa men Azııa arasyndaǵy jańa tsıfrlyq kópirge aınalady. Ol anaǵurlym joǵary halyqaralyq ótkizý qabiletin qamtamasyz etedi. Derekter almasýda bógelýdi azaıtady. Baılanysty ártaraptandyryp, dereter jóneltýde turaqtylyqqa jol ashady. Munyń bári derekterdi óńdeý ortalyqtaryn, jasandy ıntellektini jáne aımaqtyq deńgeıdegi tsıfrlyq platformalardy damytady, — dedi Jaslan Mádıev keńestiń 38-shi plenarlyq otyrysynda.
Sonymen birge, ol tsıfrlyq saladaǵy elimizdiń eń basty jobasy «Derekterdi óńdeý ortalyqtary alqaby» ekenin atap ótti.
— Biz jasandy ıntellektiniń esepteý ınfraqurylymy úshin álemdegi eń básekege qabiletti alańdardyń birin quryp jatyrmyz. Joba barlyq negizgi artyqshylyqty bir ortalyqqa biriktiredi: damý úshin iri alańdar; senimdi sýmen qamtý; elektr energııasynyń baǵasy kılovatt-saǵatyna 2,5 AQSh tsenti; eshqandaı bógelýsiz halyqaralyq baılanys; salyq jeńildikteri; esepteý qýatyn 1 gıgavatqa deıin arttyrý múmkindigi. Ótken aıda Qazaqstan Firebird kompanııasymen jasandy ıntellektini damytý týraly quny 10 mıllıard dollarlyq kelisimshartqa qol qoıdy. Joba tolyqtaı NVIDIA-nyń tehnologııalyq qoldaýymen qamtylǵan, — dedi mınıstr.
Sonymen qatar, ol barlyq tehnologııalyq ınvestorlardy osy ekojúıege qosylýǵa shaqyrdy.
Aıta keteıik, buǵan deıin Prezıdent «Derekterdi óńdeý ortalyqtary alqabyn» udaıy qadaǵalap otyratynyn jazǵanbyz.
