Jaslan Mádıev pılotsyz kólik jobalarynyń avtorlaryna erekshe quqyqtyq rejım berýdi usyndy

ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Úkimet otyrysynda áriptesterine pılotsyz kólik ındýstrııasyn damytý máselesine kóbirek kóńil bólýdi usyndy.

- Qazaqstanǵa pılotsyz kólik naryǵynda jahandyq oıynshylardy tartý úshin birneshe kezeńde tıisti jaǵdaılar jasaý usynylady.

Birinshi kezeńde – «rettegish qumsalǵysh» (ınnovatsııalyq jobalarǵa normatıvtik qujattardyń keıbir talaptaryn aınalyp ótýge múmkindik beretin erekshe quqyqtyq rejım – red) rejımin pılottyq iske qosý úshin test alańdary tańdalady. Kelesi kezeńde joba sátti bolǵan kezde ol ulttyq aýqymda iske qosylady, - dedi ol.

Mınıstrdiń sózinshe, mundaı bastama Qazaqstanǵa birqatar strategııalyq artyqshylyqtar ákeledi.

- Birinshiden, halyqaralyq kompanııalar men ınvestıtsııalardy tartý jeńildeıdi. Waymo (Google), Tesla, Baidu, Mobileye, Yandex, Huawei sııaqty kompanııalar pılotsyz synaý úshin ıkemdi retteletin elderdi belsendi túrde izdeıdi.

Ekinshiden, avtonomdy avtomobılderge arnalǵan zertteýlerge, ınfraqurylymǵa jáne komponentter óndirisine sheteldik ınvestıtsııalardyń aǵyny artýy múmkin.

Mysaly, Birikken Arab Ámirliginde «rettegish qumsalǵysh» rejımi WeRide jáne Cruise kompanııalaryna Dýbaıda pılotsyz taksılerdi synaýǵa múmkindik berdi. Bul kólikti jergilikti tsıfrlandyrýdy jedeldetti.

Úshinshiden, bul pılotsyz tehnologııalar salasyndaǵy jergilikti startaptardyń damýyna yqpal etedi, - dedi Jaslan Mádıev.

Vedomstvo basshysy AQSh, Qytaı, Reseı sııaqty elderde pılotsyz kólikter tartylǵan jobalar sátti júzege asyrylyp jatqanyn mysalǵa keltirdi.

- Pılotsyz kólik naryǵynyń áleýeti úlken. Sarapshylardyń boljamy sondaı. Mysaly, 2035 jylǵa qaraı pılotsyz kólik naryǵy 3 trln dollar bolady. Bul degen shamamen 100 ese ósim, - deıdi mınıstr.

Buǵan deıin bıyl eldegi avtojoldardyń aqyly ýchaskelerindegi tarıfter orta eseppen 30 paıyzǵa ósýi josparlanǵany málim bolǵan edi.