Jaslan Mádıev OPEN AI men Google-ge básekeles qazaqstandyq startapty atady

ASTANA. KAZINFORM – Májiliste Astana Hub pen Innovatsııalyq tehnologııalar parkin biriktirý týraly zań jobasy birinshi oqylymda talqylanyp jatyr.

Otyrysta Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Astana Hub-tan qoldaý kórip, halyqaralyq naryqqa shyqqan ınnovatsııalyq startaptardyń qazirgi jaı-kúıine toqtaldy.

- Astana Hub-ta qurylǵan bıznes-protsester tıimdi jáne úzdik tájirıbelerge sáıkes jumys isteıtinin kórsetti. Qazirdiń ózinde 500-ge jýyq rezıdent jylyna 480 mln dollardyń eksportyn óndiredi. Investıtsııa tartqan jáne aýqymdy otandyq tabysty startaptardyń birneshe mysalyn keltirgim keledi, - degen mınıstr Higgsfield generatıvti jasandy ıntellekt modeliniń áleýetine erekshe toqtaldy.

- Bul qural mátindik suranys boıynsha beıneler jasaıdy. Startap Kremnıı alqabynyń áıgili venchýrlyq qorlarynda 16 mıllıon dollar ınvestıtsııa tartty. Qazirgi tańda ol OPEN AI jáne Google sııaqty iri tehnologııalyq alpaýyttardyń ónimderine tikeleı básekeles bolyp esepteledi, - dedi Jaslan Mádıev.

Aıta ketý kerek, jyl basynda Astana Hub rezıdentteriniń 90-nan astam elge IT-qyzmet eksporttaǵany belgili bolǵan edi.