Jaslan Mádıev: Ǵaryshtyq derekter ekonomıka men memlekettik basqarýdyń tıimdiligin arttyrýy tıis
ASTANA. KAZINFORM — Qazaqstan ǵaryshtyq tehnologııalardy ekonomıkanyń, memlekettik basqarýdyń jáne azamattardyń naqty qajettilikterin sheshýge baǵyttaýy kerek. Bul týraly Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev Space Days Kazakhstan halyqaralyq forýmynda aıtty.
Mınıstrdiń aıtýynsha, spýtnıkterdi ushyrý men ǵarysh apparattaryn jasaý túpki maqsat emes. Negizgi mindet ǵaryshtyq tehnologııalardyń el ekonomıkasy men qoǵamǵa naqty paıda ákelýin qamtamasyz etý.
— Búginde Qazaqstannyń ǵaryshtyq derekteri tótenshe jaǵdaılarǵa den qoıý, tabıǵı jáne ekologııalyq protsesterdi baqylaý, sondaı-aq klımattyq ózgeristerdi baǵalaý baǵyttarynda qoldanylyp keledi. Bul derekter memlekettik organdar men ekonomıka úshin qajetti analıtıkalyq ónimder men tsıfrlyq servısterdi qalyptastyrýǵa múmkindik beredi, — dedi Jaslan Mádıev.
Onyń aıtýynsha, Qazaqstan endi jekelegen spýtnıktik sýretterdi paıdalanýdan ǵaryshtyq derekterdi keshendi taldaýǵa kóship jatyr.
— Bul rette jasandy ıntellekt, úlken derekter jáne tsıfrlyq platformalar negizgi tehnologııalyq quraldarǵa aınalady. Jasandy ıntellekt ǵaryshtyq derekterdi jedel óńdeýge, ózgeristerdi erte kezeńde anyqtaýǵa jáne boljamdardyń dáldigin arttyrýǵa múmkindik beredi, — dedi mınıstr.
Jaslan Mádıev ǵarysh salasyn damytýdyń úsh negizgi basymdyǵyn atap ótti. Olar ǵaryshtyq derekter ekonomıkasy, óndiristik-tehnologııalyq áleýet jáne adamı kapıtal.
Birinshi baǵyt aıasynda analıtıkalyq ónimderdiń sapasyn arttyrý, jasandy ıntellekt tehnologııalaryn keńinen engizý jáne ǵaryshtyq derekterdi memlekettik aqparattyq júıelermen ıntegratsııalaý josparlanyp otyr.
— Basty qaǵıdat azamattarǵa, memleketke jáne ekonomıkaǵa naqty qajettiligi bar servısterdi qalyptastyrý. Biz ǵaryshtyq derekterdi óz aldyna maqsat retinde emes, naqty ekonomıkalyq jáne áleýmettik mindetterdi sheshýdiń quraly retinde qarastyrýymyz kerek, — dedi vedomstvo basshysy.
Ekinshi basymdyq Qazaqstannyń óndiristik jáne tehnologııalyq áleýetin kúsheıtý.
Mınıstrdiń sózinshe, elimiz spýtnıkterdi birlesip óndirý, Jerdi qashyqtan zondtaý jáne spýtnıktik baılanys júıelerin damytý boıynsha halyqaralyq seriktestikke ashyq.
Sonymen qatar Qazaqstan spýtnıkterdi qurastyrý, synaqtan ótkizý jáne ushyrý ınfraqurylymyn birlesken halyqaralyq jobalarda paıdalanýǵa daıyn.
— Bizdiń negizgi mindetimiz — ınvestıtsııalar men ozyq tehnologııalardy tartý, jańa sheshimderdi kommertsııalandyrý jáne qazaqstandyq ǵarysh ónimderi men qyzmetteriniń halyqaralyq naryqtarǵa shyǵýyn qamtamasyz etý, — dep atap ótti Jaslan Mádıev.
Úshinshi baǵyt — adamı kapıtaldy damytý.
Bul rette ǵylym, bilim berý jáne ǵarysh ındýstrııasy arasyndaǵy baılanysty kúsheıtý, halyqaralyq oqytý baǵdarlamalaryn keńeıtý jáne jas mamandardy iri ǵaryshtyq jobalarǵa tartý kózdelip otyr.
— Bizdiń maqsatymyz óz tehnologııasyn meńgergen ǵana emes, halyqaralyq deńgeıde básekege qabiletti ınjenerler men mamandardyń jańa býynyn qalyptastyrý, — dedi mınıstr.
Jaslan Mádıevtiń aıtýynsha, osy úsh baǵytty júıeli damytý Qazaqstanǵa básekege qabiletti ǵaryshtyq ónimder men qyzmetterdi qalyptastyrýǵa múmkindik beredi.
Osy maqsatta Space Days Kazakhstan halyqaralyq forýmy iske qosyldy.
— Biz úshin forýmnyń basty nátıjesi qatysýshylar sany nemese is-sharalardyń aýqymy emes. Eń bastysy — naqty kelisimderge qol jetkizý, birlesken jobalardy iske qosý jáne jańa tehnologııalyq ári ınvestıtsııalyq seriktestikter qalyptastyrý, — dep tolyqtyrdy ol.
Eske sala keteıik, Qazaqstanda Jerdi qashyqtyqtan zondtaý ǵarysh júıesiniń ulttyq operatory aıqyndalǵan edi.
