Jaslan Mádıev baılanys sapasyn jaqsartý sharalaryn atady
ASTANA. KAZINFORM – Elimizdegi bazalyq stantsııalardyń radıo sıgnalynyń shekti ruqsat etilgen deńgeıi boıynsha normatıvterdi qaıta qaraý qajet. Bul týraly Úkimet otyrysynda Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Madıev aıtty.
«Mınıstrlik baılanys sapasyn jaqsartý úshin kelesi naqty sharalardy usynady. Eldi mekenderdiń bas josparlary men Naqty josparlaý jobasynda baılanys sapasyn jaqsartý jónindegi júıeli shara retinde baılanys jelileriniń tıisti ınfraqurylymy kózdeldi. Oljas Abaıuly, osyǵan baılanysty, Sizden barlyq ákimdikke baılanys operatorlarymen birlesip, baılanys quraldaryn ornalastyrý úshin bas josparlar men oryndy naqty josparlaý jobasyna túzetýler engizýdi tapsyrýyńyzdy suraımyn», - dep ótindi mınıstr Premer-Mınıstr Oljas Bektenovten.
Mınıstr kelesi shara elimizdegi bazalyq stantsııalardyń radıo sıgnalynyń shekti ruqsat etilgen deńgeıi boıynsha normatıvterdi qaıta qaraýdy usyndy.
«Qazaqstanda damyǵan elderge jáne tipti jaqyn shetelderge qaraǵanda 10-20 ese qatań normatıvter bar. Osyǵan baılanysty, Densaýlyq saqtaý mınıstrligine ozyq halyqaralyq tájirıbeni eskere otyryp, radıo sıgnaldyń shekti ruqsat etilgen deńgeıi boıynsha normatıvterdi qaıta qaraýdy tapsyrýdy suraımyn», - dedi Jaslan Mádıev.
Onyń aıtýynsha, qalalarda Internet pen uıaly baılanystyń joǵary sapasyn qamtamasyz etý aıasynda mınıstrliktiń tehnıkalyq mamandary baılanys sapasyna ólshemder júrgizedi. Ólsheý nátıjeleri boıynsha baılanys sapasy tómen oryndar anyqtalady.
«Odan soń mınıstrlik ákimdikter jáne uıaly baılanys operatorlarymen birlesip „aq daqtardy“ joıý boıynsha jumystar júrgizedi. Bul jumys baılanys sapasyn elimizdiń qalalarynda jaqsartý máselesi boıynsha jalǵasatyn bolady», - dedi ol.
Buǵan deıin baılanys operatorlary 5G tehnologııasyn damytýǵa 450 mıllıard teńge ınvestıtsııa salatynyn jazǵan edik.
