Jaslan Mádıev: barlyq memlekettik organ QazTech platformasymen jumys isteıdi
ASTANA.KAZINFORM — Úkimet otyrysynda QR Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev memlekettik organdar qyzmetin QazTech platformasyna kóshirý barysy jóninde málimdeme jasady.
Onyń sózinshe, Úkimet qoldanystaǵy júıelerdi QazTech platformasyna kóshirýdiń eki jyldyq josparyn bekitti.
— Bul rette: júıelerdiń qaıtalanýy joıylady, eskirgen júıelerdi paıdalaný toqtatylady. Bıyl 39 júıeni kóshirý josparlanǵan. Onyń 36-sy boıynsha jumystar aıaqtalý satysynda. Jospardan tys taǵy 25 júıe boıynsha kóshirý jáne ázirlený jumystary júrgizilýde. Búginde 10 aqparattyq júıe platformada tolyqqandy jumys istep tur, ıaǵnı jumys jospardan ozyq qarqynmen júrgizilýde. Búginde barlyq memlekettik organ QazTech platformasymen jumys isteıdi, — dedi Jaslan Mádıev.
Onyń aıtýynsha, Memleket basshysy QazTech-ten tys jańa júıeler qurýǵa moratorıı engizý boıynsha Jarlyqqa qol qoıdy. Bul talaptyń saqtalýy tsıfrlandyrýǵa arnalǵan bıýdjettik ótinimderdi saraptaý kezinde tekseriledi.
Sonymen qatar, atalǵan platforma qazirdiń ózinde tıimdiligin dáleldep otyr.
— QazTech platformasyna kóshkennen keıin tsıfrlyq servıster jumysynda irkilister tirkelgen joq. Buǵan naqty mysal — jyl saıyn halyq úshin ashylatyn birinshi synypqa qabyldaý qyzmeti. Burynǵy ınfraqurylym júktemeni kótere almaı, iske qosylǵan alǵashqy kúni-aq isten shyǵatyn. Mundaı jaǵdaı tórt jyl qatarynan qoǵamda teris rezonans týǵyzdy. Bıyl Oqý-aǵartý mınıstrligi jáne Qazaqtelekommen birlesip, qyzmet QazTech platformasynda qaıta jınaqtaldy. Ekinshi aı qatarynan birde-bir aqaýsyz jumys istep tur. 365 myńnan astam ótinim sátti óńdeldi, — dedi mınıstr.
Aıta keteıik, buǵan deıin barlyq vedomstvolyq júıe QazTech biryńǵaı platformasyna kóshiriletinin jazǵanbyz.
