Jasyryn mehanızmder jáne nómiri joq kólikter: aqmolalyq júrgizýshiler kameralardy qalaı aldap júr
ASTANA. KAZINFORM – Aqmola oblysynda kólik nómirine qatysty 800-den astam zańbuzýshylyq anyqtaldy. Júrgizýshiler jyldamdyqty asyryp, aıyppul salmaý nemese júk kólik ıeleri shamadan tys júk tıeýin jasyrý úshin nómirlerin jasyrýǵa tyrysady.
Aqmola oblystyq polıtsııa departamenti baspasóz qyzmetiniń málimetinshe, zamanaýı beınebaqylaý tehnologııalary men tártip buzýshylyqtardy tirkeý júıesi bar kezde kólikterdiń nómirlerdi jasyrý áreketinen esh paıda joq.
— Kóbine jyldamdyq shegin asyrǵandar men júkti asyra tıep alǵan júrgizýshiler jaýapkershilikten qutylý úshin zańbuzýshylyqtardy jasyrýǵa tyrysady, — deıdi oblystyq polıtsııa departamentiniń vzvod komandıri Jangeldi Álibekov.
Mysaly, 17 mamyrda saǵat 21:00 shamasynda «Astana — Qabanbaı batyr — Temirtaý» avtojolynyń 17-shi shaqyrymynda patrýldik polıtsııa qyzmetkerleri Shacman markaly júk kóligin toqtatqan. Qujattardy tekserý kezinde ınspektorlar erekshe ornatylǵan nómirge nazar aýdarǵan.
— Tolyǵyraq qaraǵanda, nómirdiń artynda arnaıy tros mehanızmi ornatylǵany anyqtaldy. Bul júrgizýshige nómirdi qajetti sátte beınebaqylaý kameralaryna oqylmaıtyndaı etip tómen túsirýge, keıin qaıta bastapqy ornyna tez qaıtarýǵa múmkindik beredi. Júrgizýshi quqyqbuzýshylyqty moıyndaǵan, — dep habarlady vedomstvo.
Taǵy bir jaǵdaı «Astana — Şýchınsk» trassasynyń 109-shy shaqyrymynda tirkeldi. Beınekameralar memlekettik nómirsiz júrgen Hyundai Sonata kóligin anyqtady. Aqparat dereý jaqyn mańdaǵy patrýldik ekıpajdarǵa jiberildi. Trassanyń 108-shi shaqyrymynda kólik toqtatylyp, quqyqbuzýshylyq joıyldy.
Barlyq faktiler boıynsha júrgizýshiler ákimshilik jaýapkershilikke tartyldy.
Polıtsııa málimetinshe, bıyl jyl basynan beri óńirde jalǵan nemese jasyrylǵan memlekettik nómirlerge baılanysty 800-den astam quqyqbuzýshylyq tirkelgen.
Aıta keteıik, Astanada qoǵamdyq qaýipsizdik 36 myńnan astam beınekameramen baqylanady.
