Jasyryn ken oryndaryn izdeý úshin ınnovatsııalyq ádis qoldanylady — mınıstr
ASTANA. KAZINFORM — Eldegi kásiporyndardyń ınnovatsııaǵa jumsaǵan shyǵyny tórt jarym esege ósip, 1,9 trıllıon teńgege jetti. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.
Onyń aıtýynsha, Ónerkásiptik saıasat týraly zań tsıfrlyq transformatsııa, ındýstrııa 4.0 tehnologııalaryn engizý, ındýstrııalyq ınfraqurylymdy damytý jáne kásiporyndardy jańǵyrtý úshin ınvestıtsııa tartýǵa basymdyq beredi.
— Bul sharalardy iske asyrý naqty nátıje berip keledi. Óńdeý ónerkásibinde kásiporyndardyń ınnovatsııaǵa jumsaǵan shyǵyny 2021 jylmen salystyrǵanda tórt jarym esege ósip, 1,9 trıllıon teńgege jetti, — dep atap ótti Ónerkásip mınıstri.
Geologııa salasynda tereńde ornalasqan, dástúrli ádistermen anyqtalmaıtyn jasyryn ken oryndaryn izdeý úshin ınnovatsııalyq geohımııalyq ádis engizilýde. Bul ádis jer astyndaǵy metaldardyń álsiz izderin anyqtaýǵa múmkindik beredi.
— Osylaısha mamandar paıdaly qazbalardyń bar-joǵyn anyqtaı alady. Alynǵan derekter 2D jáne 3D model túrinde shyǵarylyp, perspektıvti aımaqtardy dál aıqyndaýǵa múmkindik beredi, — dedi E. Naǵaspaev.
Taý-ken metallýrgııa salasynda shıkizat óńdeý tıimdiligin arttyrý jáne tómen sapaly, tehnogendik resýrstardy qaıta óńdeý úshin ınnovatsııalyq sheshimder engizilgen.
Mundaı jumystar negizinen jer qoınaýyn paıdalanýshylardyń mindetti túrde tólenetin 1 paıyzdyq qarajat esebinen qarjylandyrylady. Al basym baǵyttardy Mınıstrlik janynda qurylǵan Ǵylymı-tehnıkalyq keńes aıqyndaıdy.
Aıta keteıik, búgin Úkimet otyrysy ótip, onda ınnovatsııalardy damytý máseleleri talqyǵa túsedi.
