«Jasyl» salyq engizý týraly usynysty jan-jaqty taldaý qajet — Ekologııa mınıstrligi

ASTANA. KAZINFORM — Ekologııa jáne tabıǵı resýrstar vıtse-mınıstri Jomart Álıev Qazaqstanda «jasyl» salyq engizý jónindegi depýtattardyń usynysyna túsinikteme berdi.

—«Jasyl» salyq qandaı ónimderge, qansha kólemde engiziledi qazir naqty aıtý óte qıyn. Sebebi bul is júzinde barlyq salaǵa áser etedi. Sondyqtan úlken salystyrmaly makroekonomıkalyq taldaý qajet, — dedi Jomart Álıev Astanada ótken IX eýrazııalyq bıznes forýmda BAQ ókilderiniń saýalyna jaýap bere turyp.

Sondaı-aq vıtse-mınıstr atalǵan máseleniń kún tártibinde turǵanyn aıtyp otyr.

— Bul másele kún tártibinde tur. Úkimet basshysynyń radıoaktıvti qaldyqtardan basqa qaldyqtardy basqarý tujyrymdamasyn ázirleý týraly tapsyrmasy bar. Qazir bul tujyrymdama bizdiń mınıstrlikte ázirlený satysynda. Oǵan barlyq múddeli tarap, onyń ishinde bıznes-qoǵamdastyq pen depýtattyq korpýs ta tartylǵan, — dep túsindirdi ol.

Mınıstr orynbasarynyń aıtýynsha, jańa tujyrymdama jobasyn alǵashqy qoǵamdyq talqylaýǵa bıyl qyrkúıekte shyǵarý josparlanyp otyr.

— Eger tujyrymdama jobasynda qaldyqtarǵa qatysty jeke zań jobasyn ázirleý qajettigi naqty kórsetilse, biz oǵan kelemiz dep oılaımyn. Bul másele tujyrymdama aıasynda sheshiledi, — dep tolyqtyrdy Jomart Álıev.

Buǵan deıin Májilis depýtaty Ajar Saǵyndyqova Qazaqstanda qaldyqtardy basqarý boıynsha jeke zań jobasyn ázirleýdi usynyp, «jasyl» salyq engizýdi alǵa tartty.