«Jasyl mektepter» platformasy Ortalyq Azııa elderine ne beredi
ASTANA. KAZINFORM — «Jasyl mektep» óńirlik platformasy Ortalyq Azııadaǵy yntymaqtastyq tetigine aınalýy kerek. Bul týraly elordadaǵy Óńirlik ekologııalyq sammıtte Oqý-aǵartý mınıstri Juldyz Súleımenova málim etti.
— Pedagogterdi daıarlaý erekshe basym baǵyt bolyp qala beredi. Qazirdiń ózinde 50 000-nan astam muǵalim jańa tásilderdi engizý turaqtylyǵyn qamtamasyz etetin ekologııalyq jáne klımattyq bilim berý boıynsha oqytyldy. Mektepter birte-birte balalardyń ǵana emes, jalpy qoǵamnyń ekologııalyq mádenıetin qalyptastyra alatyn, sondaı-aq otbasylardy, jergilikti qaýymdastyqtar men ókilderdi jumyldyratyn ortalyqqa aınalyp keledi. Osy arqyly bilim salasy búkil qoǵamǵa ekologııalyq qundylyqtardy taratý kózine aınalyp jatyr, — dedi J. Súleımenova.
Bul turǵyda ol klımattyq syn-qaterler óte aýqymdy ekenin atap ótti. Sý qaýipsizdigi, topyraq quramynyń nasharlaýy jáne klımattyń ózgerýi máseleleri barlyq el men óńirlerdiń birlesken áreketin talap etedi.
— Sondyqtan UNICEF qorymen birge «Jasyl mektepter» óńirlik platformasy bizdiń aımaq úshin strategııalyq yntymaqtastyq mehanızmine aınalýy kerek. Ol tájirıbe almasýǵa, tásilderdi úılestirýge, oqý materıaldaryn birlesip ázirleýge jáne Ortalyq Azııadaǵy ornyqty damý úshin biryńǵaı bilim berý keńistigin qurýǵa múmkindikter ashady. Búginde osy óńirdegi halyqtyń 60 paıyzdan astamyn jastar qurap otyr. Sondyqtan olar bizdiń ortaq bolashaǵymyzdy aıqyndaıdy, — dedi mınıstr.
Eske salsaq, bıyl aqpan aıynda Ortalyq Azııa elderi «Jasyl mektepter» platformasyn iske qosýdy talqylady.
Ol Ortalyq Azııa elderiniń ekologııalyq turaqty bilim berý júıelerine kóshýin qoldaýǵa arnalǵan. Platforma klımattyq bilim berýdi ilgeriletý, klımatqa tózimdi mektep ınfraqurylymyn damytý, jastardyń bastamalaryn qoldaý jáne bilim berý sektorynda basqarý jáne qarjylandyrý júıelerin nyǵaıtý úshin úkimetterdi, damý seriktesterin jáne halyqaralyq qarjy ınstıtýttaryn biriktiredi.