Jasyl energııa men farmatsevtıka: Qazaqstan men Úndistan yntymaqtastyǵy keńeıýde

ASTANA. KAZINFORM — Qazaqstan jáne Úndistan energetıka, farmatsevtıka jáne joǵary tehnologııalar salalaryndaǵy ınvestıtsııalyq yntymaqtastyqty keńeıtip otyr. 

Úndistan Respýblıkasyna resmı sapary aıasynda Premer-mınıstrdiń orynbasary – Syrtqy ister mınıstri Murat Nurtileý jetekshi úndi kompanııalarynyń ókilderi – «Tata Sons Private Limited» kompanııasynyń bıznesti damytý jáne korporatıvtik baılanystar jónindegi prezıdenti Sýcharıta Choýdarı, «MSN Group» farmatsevtıkalyq korporatsııasynyń atqarýshy dırektory Nıhıl Reddı, «Vishwa Samudra Group» ınfraqurylymdyq holdınginiń dırektorlar keńesiniń tóraǵasy Sasıdhar Chınta men «Greenko Group» energetıkalyq kompanııasynyń basshylyǵymen kezdesýler ótkizdi.

S.Choýdarımen kezdesý barysynda mınıstr energetıka, avtokólik óndirisi, fınteh, metallýrgııa jáne aqparattyq tehnologııalar salalaryndaǵy yntymaqtastyqtyń áleýetin atap ótti.

Qazaqstan tarapy sheteldik ınvestorlarǵa usynylatyn salyqtyq jáne kedendik jeńildikterdi, ınfraqurylymdyq qoldaýdy qamtıtyn preferentsııalar paketimen tanystyrdy.

- Avtokomponentterdi jergiliktendirý, metallýrgııany damytý, ekologııalyq kólik pen «Astana Hub» jáne «Digital Almaty» alańdary arqyly tsıfrlandyrý máseleleri talqylandy. «Tata Group» energetıka (onyń ishinde jańartylatyn energııa kózderi), sırek jer metaldaryn óndirý, týrızm, bolat jáne tamaq ónerkásibi, sondaı-aq avtokólik qurastyrý salalaryndaǵy jobalarǵa qyzyǵýshylyq bildirdi. «Tata Power» kompanııasyna jańartylatyn energııa jobalaryn damytýǵa qatysý usynyldy, - delingen habarlamada.

N.Reddımen ótken kelissózderde Almaty oblysynda «Medservıs Plıýs» kompanııasymen birlesip farmatsevtıkalyq zaýyt salý máselesi talqylandy, atalǵan jobanyń ınvestıtsııa kólemi shamamen 60 mln AQSh dollaryn quraıdy. Qazaqstan SІM basshysy aldaǵy jyldary dárilik zattardy 50% deńgeıinde jergiliktendirýdiń mańyzdylyǵyna nazar aýdardy. Qoldaý sharalary aıasynda uzaqmerzimdi kelisimsharttar, 2024 jylǵy shildeden bastap mindetti tańbalaý, sondaı-aq 300 myń dollarynan joǵary ınvestıtsııa quıǵan ınvestorlarǵa arnalǵan 10 jylǵa deıingi «altyn vıza» múmkindigi qarastyryldy. Sonymen qatar tehnologııa transferi men Qazaqstanda tolyq óndiristik tsıkl qurý máseleleri qaraldy.

«Vishwa Samudra Group» kompanııasynyń dırektorlar keńesiniń tóraǵasy S.Chıntamen ótken kezdesýde Aqtaý halyqaralyq teńiz portyn jańǵyrtý jáne keńeıtý boıynsha jobalarǵa atalǵan kompanııanyń qatysý múmkindigi, sondaı-aq Orta dálizdi damytý aıasyndaǵy yntymaqtastyq talqylandy. Mınıstr tehnologııalyq turǵydan senimdi ári joǵary bilikti seriktestermen ózara is-qımyldyń mańyzdylyǵyn atap ótip, kólik, port jáne tsıfrlyq ınfraqurylym salalaryndaǵy jobalarǵa qoldaý kórsetýge daıyn ekenin jetkizdi.

«Greenko Group» kompanııasynyń basshylyǵymen ótken suhbat jańartylatyn energııa kózderi, kún jáne jel generatsııasy, sondaı-aq jasyl sýtegi óndirý salalaryndaǵy yntymaqtastyqqa arnaldy. Taraptar Qazaqstannyń tabıǵı resýrstary men Úndistannyń tehnologııalaryn biriktirý arqyly energetıkalyq aýysymdy jedeldetýge ózara qyzyǵýshylyq bildirdi. Kompanııa tehnologııa transferine, birlesken kásiporyndar qurýǵa jáne Qazaqstandaǵy óz qyzmetin keńeıtýge daıyn ekenin rastady.

Kezdesýlerdiń qorytyndysy boıynsha Qazaqstanda ózara tıimdi jobalardy iske asyrýǵa múddeli úndi kompanııalaryna jan-jaqty qoldaý kórsetý jáne naqty ınvestıtsııalyq bastamalardy pysyqtaý jóninde ýaǵdalastyqqa qol jetkizildi.