Jasyl elge — 20 jyl: 5 myńnan asa astanalyq jas eńbek maýsymyn bastady
ASTANA. KAZINFORM — Baǵdarlama aıasynda eńbek etken jastarǵa aıyna 64 565 teńge jalaqy beriledi.
Búgin Astananyń Jastar saıasaty máseleleri basqarmasynyń qoldaýymen, respýblıkalyq stýdenttik qurylys jáne jastar jasaqtary qozǵalysy qoǵamdyq qorynyń uıymdastyrýymen «Stýdenttik qurylys jáne «Jasyl el» jastar eńbek jasaqtarynyń HXI eńbek maýsymy saltanatty túrde ashyldy.
— Bıyl «Jasyl el» baǵdarlamasyna 20 jyl, búgin jańa eńbek maýsymynyń ashylýyna kelip otyrmyz. Byltyr Astana qalasy boıynsha «Jasyl el» baǵdarlamasy aıasynda 4 myń bala eńbek etti, suranystyń artýyna baılanysty qala basshylyǵyna bıýdjetten qarjy qarastyryp, bıyl 5200 jasóspirim jáne jastardyń eńbek etýine múmkindik jasaldy. Atalǵan baǵdarlama 14 pen 35 jas aralyǵyndaǵy azamattarǵa arnalǵan, jalaqy tólenedi. Osylaısha, ár jas azamat nápaqasyn taýyp, jaz boıy eńbektenedi. Bıyl «Jasyl el» baǵdarlamasy «Taza Qazaqstan» ekologııalyq aktsııasy aıasynda ótip jatyr, — dedi Astana qalasy ákimdigi janyndaǵy áıelder isteri jáne otbasylyq-demografııalyq saıasat jónindegi komıssııa tóraǵasynyń orynbasary, qala ákiminiń genderlik máseleler boıynsha keńesshisi Nazgúl Maǵjan.
Onyń aıtýynsha, «Jasyl el» baǵdarlamasy jastardy eńbekke baýlıdy, sonymen qosa qyzyǵýshylyǵy ortaq jastardyń basyn biriktiredi.
— Jastardy tazalyqqa, eńbekqorlyqqa baýlıdy, jastar osy jerden ózine dos tabady, kópshilikpen jumys isteýdi úırenedi. Jumys jas ereksheligine qaraı bólinedi, jasóspirimder mektep janyndaǵy jasyl-jelekke jaýapty bolady, aǵash sýarý, qoqys jınaý, aram shópterdi julý taǵy sol sııaqty jumys isteıdi, ıaǵnı jetkinshekterge aýyr jumys berilmeıdi. Jasóspirimder ata-anasynyń ruqsatymen ǵana jumys isteıdi, — deıdi ol.
«Jasyl el» baǵdarlamasy aıasynda eńbek etken jastarǵa aıyna 64 565 teńge jalaqy beriledi. Jasóspirimder aptasyna 5 kún, al kúnine 4 saǵat jumys isteıdi.
— «Jasyl el» baǵdarlamasy arqyly osymen ekinshi jyl jumys istep jatyrmyn, maǵan unaıdy. Jumystan tys kóptegen óte qyzyqty is-sharalar ótedi. Ózimizge de paıdaly, qoǵamǵa da paıdamyz tıedi, aılyq ýaqtyly tólenedi. Jastardy jumys isteýge shaqyramyn, jumys qıyn emes, qoqys jınaımyz, aǵash sýaramyz, aram shópterdi julamyz taǵy sol sııaqty. Arnaıy forma beredi jáne qajetti qural-jabdyqpen qamtıdy. Jumys kezinde qasymyzda kolledj ustazdary jáne «Jasyl el» baǵdarlamasynyń ókilderi júrip, jumys barysyn qadaǵalaıdy, — deıdi 16 jasar kolledj stýdenti Bekjan Aldabergen.
Sondaı-aq Esil ózeni jaǵasynda ornalasqan amfıteatrǵa jınalǵan eńbekqor jastar kontsert tamashalady.
— Qaıyrly kesh, jalyndy jastar! Sizderdi «Jasyl el» 21-i eńbek maýsymynyń saltanatty ashylýymen quttyqtaımyn. Astana qalasynyń ákimdigi jastardy eńbekke baýlýǵa erekshe kóńil bóledi. Astana — tazalyq pen tártiptiń úlgisi. Sizder kópke úlgisizder, qorshaǵan ortany taza ustaýǵa, adal eńbek etetinderińizge senemiz. Eńbek maýsymy sátti ótsin, — deıdi Astana qalasynyń Jastar saıasaty máseleleri basqarmasy basshysynyń mindetin atqarýshy Baǵdat Atymtaev.
Aıta keteıik, atalǵan joba jyl saıyn Qazaqstan boıynsha 30 000-nan astam jasty maýsymdyq jumyspen qamtıdy. Bıyl «Jasyl el» baǵdarlamasyna 140 myń stýdent qatysady.