«Jasyl el» baǵdarlamasy: 14 jastan asqan astanalyqtar jumys isteı alady
ASTANA. KAZINFORM — Astanada 14 jasqa tolǵan balalar da resmı jumys isteı alady. Bul týraly «Jasyl el» joba jetekshisiniń orynbasary Kazinform tilshisine bergen suhbatynda málimdedi.
— «Jasyl el» jobasy eldiń barlyq óńirinde jumys isteıdi. Jumys oryndarynyń sanyn ár aýmaqtyń ákimdigi belgileıdi. Olardyń eń irileriniń biri — Astana qalasy. Bıyl munda 5 200-den astam jasty jumyspen qamtý úshin bos oryndar berildi. Qazirgi ýaqytta 3 myńnan astam jastar jumys istep jatyr. Jazǵy maýsym jumystary mamyr aıynan bastalyp, tamyzdyń sońyna deıin jalǵasady. Elordadaǵy «Jasyl el» baǵdarlamasynyń eń basty ereksheligi — biz jumysqa 14 jastan bastap 35 jasqa deıingi jastardy qabyldaımyz. Qazir 3 myńnan astam «Jasyl el» sarbazdarynyń 90 paıyzdan astamy — 14 jastan endi asqan balalar. Osylaısha jastarymyzdyń sanasynda ekomádenıetti qalyptastyrýdy maqsat etip otyrmyz, — deıdi Asylbek Baqytbekuly.
Maman 14 jasqa tolǵan balalardyń jumysqa ornalasý úshin ne isteý keregin túsindirdi.
— 16 jasqa tolmaǵan jastar Qazaqstan Respýblıkasynyń zańnamasyna sáıkes 4 saǵattan artyq jumys istemeıdi. Olarǵa jeńil jumys beriledi. 16-dan asqan jastar ata-anasynsyz kelip, ótinish toltyra alady. Al odan kishileri mindetti túrde ata-anasymen kelýi kerek. Olar týý týraly kýálik, ata-analarynyń qujattary jáne senimhatyn alyp kelýi qajet. Sonymen qatar áleýmettik osal topqa jatatyn bolsa, ony dáleldeıtin anyqtamany da birge alyp kelý kerek, — deıdi «Jasyl el» joba jetekshisiniń orynbasary.
«Jasyl el» jobasy boıynsha jumys isteıtin jastar jalaqydan bólek túrli merekelik is-sharalarǵa tegin kire alady eken.
— Qazir oqýshylarymyz qala boıynsha jumys istep jatyr. Ózderi bilim alatyn oqý oryndary men qaladaǵy saıabaqtardaǵy aǵashtarǵa sý quıý, kóshetterge kútim jasaý sııaqty jumystarmen aınalysady. Odan bólek, jumys kúnderi respýblıka boıynsha júrip jatqan «Taza Qazaqstan» aktsııasyna da atsalysyp, belsendilik tanytady. Ár sharaǵa júzden astam «Jasyl el» sarbazyn shyǵaryp otyramyz. Olar parkterde jumysyn aıaqtaǵan soń pıknıkter uıymdastyryp, áleýmettik jelige vıdeolar túsiredi. Biz ekobelsendi jastardy tek jumysqa baýlyp qana qoımaı, elordada bolatyn merekelik is-sharalarǵa qatystyrýǵa tyrysamyz. Ol úshin bizge ákimshilikten arnaıy bıletter berilip otyrady, — deıdi maman.
«Jasyl el» jobasynda jumys isteıtin balalardyń jalaqysy tikeleı óz shottaryna túsedi. Baǵdarlama bul úshin de tıimdi jaǵdaı jasaǵan.
— 14 jastaǵy balalarǵa jalaqy berý úshin Qazaqstan Respýblıkasynda bir ǵana bank jumys isteıdi. Biz sol bankpen kelisip, jumysqa kelgen balalarǵa jeke esepshot ashamyz. Jalaqy jumys istegen oqýshynyń shotyna tikeleı túsedi. Sonymen qatar áleýmettik osal toptaǵy balalarǵa basymdyq beremiz. Olardyń ata-anasy memleketten kómek alady. Eger osy balalar jumys istep, ol aqsha ata-analardyń esepshotyna tússe, memleketten qosymsha qarastyrylǵan kómekti ala almaı qalady. Osy máseleni boldyrmaý maqsatynda biz 14 jasqa tolǵan balalarǵa jeke esepshot ashyp, jalaqyny sonda aýdarýdy jón kórdik, — deıdi Asylbek Baqytbekuly.
14 jastan asqan oqýshylar 1 aı qyzmet etkeni úshin 65 myń teńge jalaqy alady. Al kámelet jasqa tolyp, arnaıy mekemede jumys isteıtin jastardyń jalaqysy 200 myń teńgeden asady.
— Astana qalasy boıynsha bizben qurylys kompanııalary tyǵyz jumys isteıdi. Olar bizden ár maýsymda 100-den asa jasty jumysqa qabyldaıdy. Jastar onda kómekshi jumystarmen aınalysady. Ol úshin 160–180 myń teńge jalaqy alady. Odan bólek, biz taǵy 65 myń teńge yntalandyrý syıaqysyn berip, arnaıy formamen qamtamasyz etemiz. Bizde yntalandyrý syıaqysy — 1 aıǵa 65 myń teńge, — deıdi «Jasyl el» joba jetekshisiniń orynbasary.
Alaıda Asylbek Baqytbekuly «Jasyl el» baǵdarlamasy boıynsha oqýshylarmen kelisimshart tek 1 aıǵa jasalatynyn aıtady.
— Biz kóptegen jastarymyzdy ekobelsendilikke baýlý úshin ár oqýshyny 1 aıǵa ǵana jumysqa qabyldaımyz. Jumysqa suranys óte joǵary. Bizge jumysqa turý máselesi boıynsha tynymsyz hattar keledi. Keńsemizge kúnde keletin ata-analardyń da sany kóp. Bizde 5 200-den astam bos oryn bolsa, oǵan 30 myńnan astam suranys bar. Sebebi Astanada 14 jastan asqan oqýshylar da, stýdentter men jastar da óte kóp, — deıdi ol.
Al «Jasyl el» jobasynyń qatysýshysy óziniń jumys isteýine ata-anasy qarsy bolmaǵanyn aıtady. Onyń aıtýynsha, óz qatarlastarymen jumys isteý qyzyqty eken.
— Meniń ápkem ótken jyly osy «Jasyl el» jobasynda jumys istedi. Ápkeme qarap qyzyǵyp, men de jumys istegim keldi. Biraq ol jerge 14 jastan bastap alatyn bolǵandyqtan, ózimniń 14 jasqa tolǵanymdy kútip, bıyl Instagram jelisindegi paraqshasyna jazdym. Olar maǵan qajetti qujattardy jınap, kele berseń bolady dedi. Barǵan soń meni jumysqa qabyldap, maýsym aıynyń 2-sinen bastap jumysqa kirisip kettim. Ata-anam meni qoldap, «ózińe unasa, jumys isteı ber» dedi. Bizdiń jumys tobymyz ekige bólinedi. Solaı eki saıabaqtyń tazalyq jumystarymen aınalysamyz. Bir topta 100 shaqty adam bar. Olardy eki jetekshi baqylaıdy. Qazir biz Ortalyq saıabaqta aram shópterdi julyp, gúlderge, aǵashtarǵa sý quıyp, adamdar tastap ketken qoqystardy jınaýmen aınalysyp jatyrmyz, — deıdi Nuraı Dúısenǵalıeva.
Aıta keteıik, ótken aıda 5 myńnan asa astanalyq jas eńbek maýsymyn bastaǵan edi.