Jasyl dáliz: Aqtóbe prokýratýrasy ınvestorlardyń kedergisiz jumys isteýi úshin usynys berdi
AQTÓBE. KAZINFORM – Aqtóbe oblysy ákimdigi men oblystyq prokýratýra ınvestıtsııalyq jobalardy iske asyrý jumysyn jedeldetý úshin «Jasyl dázil» ornatady.
Memleket basshysy Qasym-Jomart Toqaev byltyr óńirge sapary kezinde ınvestıtsııa tartý, ınvestıtsııalyq jobalar sanyn arttyrýdy tapsyrdy. Endi ınvestıtsııalyq jobalardy iske asyrý barysyn prokýratýra da baqylaıdy.
«Memleket basshysy mańyzdy jáne iri ınvestıtsııalyq jobalardy iske qosý boıynsha barlyq qajetti sharalardy qabyldaýdy tapsyrdy. Indýstrııalyq aımaqta ınvestıtsııalyq jobalardy merziminde iske asyrýdyń barlyq kezeńin tolyq baqylaımyz»,- dedi oblys ákimi Ashat Shaharov.
Byltyr Aqtóbede óńdeý ónerkásibine tartylǵan ınvestıtsııa kólemi 84,6 mlrd teńgege jetken. Barlyǵy 18 ınvestıtsııalyq joba júzege asyryldy.
«Óńirde iske qosylǵan mańyzdy jáne iri ınvestıtsııalyq jobalardyń ishinde 1973 jyldan bastap jınalǵan shlamdy qaıta óńdeý fabrıkasyn atap ótýge bolady. Joba aımaqtyń ekologııasyna oń áser etedi. Fabrıkanyń iske qosylýynyń nátıjesinde 270-ten astam jańa jumys orny ashyldy. Jobanyń jalpy quny — 37,4 mıllıard teńge», - dedi Aqtóbe oblystyq Indýstrııalyq-ınnovatsııalyq damý basqarmasy basshysynyń orynbasary Nurtýǵan Oralbaev.
Al bıyl oblysta jalpy quny 201 mlrd teńge bolatyn 27 ınvestıtsııalyq jobany júzege asyrý josparlanyp otyr. Bul kásiporyndar iske qosylǵanda 800-den astam jumys orny ashylady.
Aıta keteıik, «Investorlardy qorǵaýdyń prokýrorlyq súzgisi» jobasy memlekettik saraptama, sáýlet-ekologııalyq baqylaý jáne ózge de satylardan ótý kezinde quqyqtyq qoldaý kórsetýge múmkindik beredi. Oblystyq prokýratýranyń qoǵamdyq múddelerdi qorǵaý basqarmasynyń basshysy Aslanbek Sábıtovtiń aıtýynsha, ınvestorlardyń máselelerin anyqtaý jáne jedel sheshý úshin «bir tereze» qaǵıdaty boıynsha front-keńse ashylǵan. Jyl basynan beri olar kásipkerlerden túsken 90-nan astam sıgnaldy óńdegen. 53 qadaǵalaý aktisi engizilip, 8 laýazymdy tulǵa jaýapkershilikke tartyldy. Sonymen birge 484 kásipkerdiń quqyǵy qorǵaldy.
Prokýrorlar óńirdi «Jasyl dáliz» aımaǵyna qosý úshin krıterıı ázirleýdi, ınvestıtsııalyq jobalardy iske asyrýǵa arnalǵan tıimdi baǵyttardy naqtylaýdy usyndy. Óńir basshysy Ashat Shaharov prokýrorlardyń bul usynysyn qoldady. Oblys ákimdigi men oblys prokýratýrasy arasynda ınvestorlarǵa arnalǵan «Jasyl dálizdi» júzege asyrý boıynsha yntymaqtastyq týraly memorandýmǵa qol qoıyldy. Memorandým tirkeýden bastap nysandardy iske qosýǵa deıingi aralyqtaǵy qujattardy tez retteýge septigin tıgizedi.
– «Jasyl dáliz» ınvestorlarǵa ruqsat qaǵazyn alý, jer telimderin berý, ınfraqurylymdy ornatý jáne tutastaı alǵanda bıýrokratııalyq kedergilerdi eńserýge qatysty máselelerdi ortalyqtandyrylǵan túrde sheshýge múmkindik beredi», — dep atap ótti oblys ákimi.
