«Jasyl Damýdyń» Kcell baǵaly qaǵazdaryn satyp alýy oryndy ma — mınıstr jaýaby

ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın «Jasyl Damý» kompanııasynyń Kcell-diń 5% úlesin satyp alǵany týraly tilshiler suraǵyna jaýap berdi. 

— Maǵan «Jasyl Damýdyń» bergen aqparaty boıynsha, bul uıymdastyrylǵan naryqtaǵy baǵaly qaǵazdardy satyp alý. 30 kún ishinde keri satyp alý shartymen «Keri repo» operatsııasy jasalǵan. Sondyqtan munda ádettegi mámile júrip jatyr. Bul jaǵdaıda kvazımemlekettik sektordyń senimdi sýbektisiniń baǵaly qaǵazdary satyp alynǵan, — dep jaýap berdi Serik Jumanǵarın Úkimette ótken baspasóz qyzmetinde.

Biraq tilshiler «Jasyl Damýdy» qurýdyń maqsaty — qaldyqtardy qaıta óńdeýdi damytý ekenin aıtyp, Kcell-ge ınvestıtsııa salýdyń qanashlyqty oryndy ekenin surady.

— Shyn máninde, «Jasyl Damý» jaqsy ınvestıtsııa jasap otyr. Qazir Ekologııa mınıstrligimen birge turmystyq qatty qaldyq polıgondaryn salý baǵdarlamasy júrip jatyr. Biraq bos qarajat ta bar, jobalar birden júzege aspaıdy. Bosqa jatqansha, nege ony 30 kúnge jaqsy quralǵa, «Kcell» baǵaly qaǵazdaryna salmasqa? Budan bólek, «Jasyl Damýdan» bólinetin qarajat qazaqstandyq óndiristegi tehnıka, júk kólikterin jáne basqalaryn satyp alýǵa salynady. Biz muny búgin ǵana talqyladyq. Indýstrııany damytý qorynyń basshysymen sóılesip, vagondar satyp alýdy, temirjol qurylysy nysandaryna ınvestıtsııa salýdy usyndym. Bul ári ekonomıkaǵa, ári kásiporyndardyń damýyna múmkindik beredi, ári jetkilikti jaqsy tabys ákeledi. Osy turǵydan alǵanda, meniń oıymsha, kompanııa jetkilikti deńgeıde jumys istep jatyr, — dep jaýap berdi Serik Jumanǵarın.

Buǵan deıin Serik Jumanǵarın Aqtóbede reseılik satyp alýshylardyń kóbeıýi týraly pikir bildirgen edi.