«Jasyl damý» AQ COP31 aıasynda tórt memorandýmǵa qol qoıdy
ASTANA. KAZINFORM- – Qazaqstannyń «Jasyl damý» AQ Túrkııanyń Antalıa qalasynda ótip jatqan COP31 klımattyq konferentsııasy aıasynda tórt memorandýmǵa qol qoıdy, dep habarlaıdy QR Ekologııa jáne tabıǵı reýrstar mınıstrliginiń baspasóz qyzmeti.
Qujattar qaldyqtardy suryptaý jáne qaıta óńdeý, qaldyq jınaýdyń zamanaýı júıelerin ázirleý, sondaı-aq jańartylatyn energetıka salalaryndaǵy yntymaqtastyqty kózdeıdi.
Memorandýmdarǵa «Jasyl damý» AQ atynan Basqarma tóraǵasy Erjan Sársenbaı qol qoıdy.
Qujattar tájirıbe men tehnologııa almasýdy, áriptestikti damytýdy, sondaı-aq qaldyqtardy basqarý jáne tsırkýlıarlyq ekonomıka salalaryndaǵy birlesken jobalardy pysyqtaýdy qarastyrady.
Áriptesterdiń biri – qaldyqtardy suryptaýǵa, qaıta tıeýge jáne qaıta óńdeýge arnalǵan jabdyq shyǵaratyn reseılik «ARM» JShQ. Kompanııa atynan memorandýmǵa bas dırektor Alekseı Popov qol qoıdy. Kásiporyn qaldyqtardy suryptaý keshenderin, qaıta tıeý stantsııalaryn jáne polımerlerdi qaıta óńdeý jelilerin jobalap, shyǵarady. Yntymaqtastyq aıasynda tájirıbe almasý jáne qaldyqtardy basqarý ınfraqurylymyn damytýǵa arnalǵan tehnologııalyq sheshimderdi zerdeleý kózdelgen.
«Pýtser Rý» JShQ (PUZER) atynan qujatqa bas dırektor Roman Plýtok qol qoıdy. Kompanııa turǵyn úılerde, qoǵamdyq jáne kommertsııalyq nysandarda qaldyqtardy jınaýǵa jáne áketýge arnalǵan ınjenerlik júıelerdi ázirlep, engizedi. Onyń sheshimderiniń qatarynda qaldyqtardy qubyrlar arqyly vakýýmmen tasymaldaý júıeleri jáne tolý deńgeıin anyqtaıtyn datchıktermen jabdyqtalǵan jerasty qaldyq jınaý júıeleri bar. Áriptestik osy tehnologııalardy qoldaný tájirıbesimen almasýǵa jáne olardy Qazaqstanda paıdalaný múmkindikterin qarastyrýǵa baǵyttalǵan.
Taǵy bir memorandým NULOOP kompanııasymen jasaldy. Kompanııa atynan qujatqa bas dırektor Tszın Ventszıýn qol qoıdy. Kompanııa Almaty oblysyndaǵy «Qaırat» ındýstrııalyq aımaǵynda paıdalanylǵan lıtıı-ıondy akkýmýlıatorlardy qaıta óńdeıtin zaýyt salý jobasyn iske asyryp jatyr. Kásiporynnyń jobalyq qýaty jylyna 10 myń tonnaǵa deıin akkýmýlıatordy qaıta óńdeýge múmkindik beredi. Jobada kózdelgen tehnologııalar lıtıı, mys, alıýmınıı jáne basqa da qundy komponentterdi bólip alyp, olardy ónerkásipte qaıta paıdalanýǵa jol ashady.
Tórtinshi memorandým «LoopEnerGren Kapıtal» JShS-men (LoopEnerGren Capital) jasaldy. Kompanııa atynan bul qujatqa da bas dırektor Tszın Ventszıýn qol qoıdy. Kásiporyn kún energetıkasy jobalaryna mamandanǵan jáne energııa jınaqtaý tehnologııalaryn damytyp keledi. Qazir ol «Qaırat» ındýstrııalyq aımaǵyndaǵy kásiporyndardy elektr energııasymen qamtamasyz etý úshin qýaty 70 MVt kún elektr stantsııasyn salý jobasyn iske asyryp jatyr.
Qol qoıylǵan memorandýmdar aldaǵy birlesken jumysqa negiz bolady. Naqty jobalar men olardy iske asyrý sharttary jeke pysyqtalady.
Osyǵan deıin Qazaqstan COP31 konferentsııasynda klımattyq ınvestıtsııalar platformasyn tanystyrǵan bolatyn.