«Jasyl damý» AQ Baıqońyrda qatty turmystyq qaldyqtardy qaıta óńdeýdi qoldaıdy

QYZYLORDA. KAZINFORM - Qyzylorda oblysy Baıqońyr qalasynda qatty turmystyq qaldyqtardan qaıtalama shıkizatty alyp, kespekshe men qojbeton blogyn óndirilýge jańa jabdyqty satyp alý úshin «GREENORDA PROJECT» JShS-nyń ınvestıtsııalyq jobasy iske asyrylady. Baıqońyr QTQ polıgonynyń aýmaǵynda ornalasatyn bul joba týraly «Jasyl damý» AQ ınvestıtsııalyq jobalar qyzmetiniń basshysy Serikbol Qalıaqbarov málimdedi.

Qazaqstan Respýblıkasynyń Ekologııa jáne tabıǵı resýrstar mınıstrliginiń ınvestıtsııalyq shtabynyń kezekti otyrysynda Qyzylorda oblysy Qarmaqshy aýdany Tóretam kentinde qatty turmystyq qaldyqtardy suryptaý jáne qurylys qaldyqtaryn qaıta óńdeý jónindegi ınvestıtsııalyq joba maquldandy. «Ónerkásipti damytý qory» AQ-da qujattardy qalyptastyrýdyń 1-kezeńinen ótti jáne ındıkatıvtik sharty jasalady.

Jobanyń qýaty jylyna 65 myń tonna qatty turmystyq qaldyqtardy qaıta óńdeýge jáne qurylys qaldyqtaryn suryptaýǵa múmkindik beredi. Baıqońyr QTQ polıgonynyń aýmaǵynda ornalasatyn kásiporynda 36 jumys orny ashylady. QTQ polıgonyna arnalǵan jer ýchaskesiniń jalpy aýdany 124,8 ga nemese 1 248 000 m2 quraıdy. Onyń ishindegi 4 ga alańǵa ákimshilik-sharýashylyq aýlasy jáne ákimshilik ǵımarat, kúzet pen tamaqtaný bólmesi sııaqty basqa da qurylystar ornalasady.

Jobanyń jalpy quny 560, 2 mln. teńge bolsa, «Jasyl damý» AQ «Ónerkásipti damytý qory» AQ arqyly onyń 504,2 mln. teńgesin bóledi. Qalǵan soma ınvestordyń óz qarajaty esebinen júrgiziledi.

Osyǵan deıin «Jasyl damý» qarjysyna jańa avtobýstar satyp alynǵany týraly jazdyq.