Jasybaıǵa kelgen týrıster qurylys alańynda demalýǵa májbúr
ASTANA. KAZINFORM - Baıanaýyldaǵy eń tanymal demalys oryndarynyń biri - Jasybaı kóliniń jaǵajaıynda qurylys jumystary júrip jatyr. Týrıster kól jaǵasynda tynyǵýdyń ornyna, qurylys tehnıkasy men salynyp jatqan nysandardyń ortasynda demalýǵa májbúr bolyp otyr.
Baıanaýyl aýdanyndaǵy týrıstik maýsym resmı túrde 10 maýsymda bastalǵanymen, óńirge demalýshylar ol ýaqyttan áldeqaıda erte kele bastaıdy. Ásirese kún jylynǵan sátten-aq kól jaǵasyna aǵylatyndardyń qatary kóbeıedi.
Alaıda bıyl Jasybaı kóline kelgen týrıster kútpegen jaǵdaıǵa tap boldy. Kól jaǵalaýynda mamyr aıynan beri aýqymdy abattandyrý jáne qaıta jańartý jumystary júrgizilip jatyr. Sonyń kesirinen jaǵajaı aýmaǵy ázirge demalys ornynan góri qurylys alańyna kóbirek uqsaıdy.
Demalýshylardyń aıtýynsha, olar jazǵy demalysyn aldyn ala josparlap, júzdegen shaqyrym jol júrip kelgen. Biraq jaǵajaıda arnaıy tehnıkanyń jumys istep jatqanyn kórgen.
– Kún ystyq bolǵandyqtan arnaıy demalýǵa keldik. Qurylys júrip jatqanyn bilmedik. Balalardy sýda ǵana emes, jaǵajaıda júrip - turý kezinde de qadaǵalaýǵa týra keledi. Árıne, keıin bári jaqsy bolady dep túsinemiz. Biraq mundaı jumystardy týrıstik maýsym bastalǵanǵa deıin aıaqtaýǵa bolmas pa edi? – deıdi demalýshylardyń biri Anatolıı Lopatenko.
Pavlodar oblystyq dene shynyqtyrý jáne sport basqarmasynyń málimetinshe, bastapqyda jaǵajaıdy jańartýǵa arnalǵan joba quny 800-900 mıllıon teńge shamasynda bolǵan. Alaıda memlekettik saraptama barysynda túzetýler engizilip, týrıster sanynyń kóptigine baılanysty qosymsha ınfraqurylym qarastyrylǵan. Sonyń nátıjesinde jobanyń jalpy quny 1 mıllıard teńgege deıin artqan.
Basqarmanyń týrızm bólimi mamandary ázirge qurylys jumystarynyń naqty qashan aıaqtalatynyn aıta almaıdy. Olardyń sózinshe, bul jumys qarqynyna jáne týrıster legine de baılanysty.
Joba tolyq aıaqtalǵannan keıin Jasybaı jaǵajaıynda fýtbol jáne voleıbol alańdary, balalar oıyn aımaǵy, fýdkorttar men dámhanalar, kıim aýystyratyn kabınalar, dýsh bólmeleri, qutqarý beketteri jáne shezlongtar ornatylady.
Al ázirge kól jaǵasynda bolashaq demalys orynynyń sulbasy ǵana kórinedi. Sondyqtan jazǵy demalysyn Jasybaıda ótkizýdi josparlaǵan týrıster qurylys jumystary tolyq aıaqtalǵansha biraz qolaısyzdyqqa tózýge májbúr.
Aıta ketsek, Baıanaýyl týrıstik kompanııalardan túsetin salyqtyń eleýli bóligin joǵaltyp otyrǵany týraly jazǵanbyz.
Kamıla Taıtóleý
