Jasy 18-den asqan múgedek bala asyrap otyrǵan ata-anaǵa qansha aılyq tólenýi kerek – Úkimet jaýaby
ASTANA. KAZINFORM – Premer-mınıstr Oljas Bektenov Májilis depýtattarynyń saýalyna bergen jaýapta múgedektigi bar bala asyrap otyrǵan ata-anaǵa zeınetaqy qalaı taǵaıyndalatynyn túsindirgen.
- Múgedektigi bar balalardy tárbıelep otyrǵan ata-ananyń erte zeınetke shyǵýy jáne zeınetaqy qoryna mindetti zeınetaqy jarnalaryn aýdarý máselesi qoldanystaǵy zańnamamen rettelgen. Múgedektigi bar balalardy tárbıelep otyrǵan ata-analardy erte zeınetke shyǵarǵan jaǵdaıda olardyń zeınetaqysy óte tómen bolady. Sebebi jetkilikti zeınetaqy alý úshin azamattar mindetti zeınetaqy jarnalaryn tóleýge turaqty qatysýy qajet. Jınaqtaýshy júıege qatysý memlekettik bazalyq zeınetaqy mólsherine de áser etedi, - dep jazylǵan jaýapta.
Premer-mınıstrdiń jaýabynan jasy 18-den asqan múgedek balany asyraǵany úshin ata-anaǵa qansha aılyq tólenetinin kórýge bolady.
- 2023 jylǵy 1 shildede Áleýmettik kodeks qabyldandy. Oǵan sáıkes múgedektigi bar balalardy (18 jasqa tolǵannan keıin) tárbıelep otyrǵan ata-analar jeke kómekshi retinde jumysqa qabyldanady. Jeke kómekshilerge jergilikti atqarýshy organdar tarapynan jalaqy (128 716 myń teńge) tólenedi. Sondaı-aq, tıisti jarnalar, sonyń ishinde mindetti zeınetaqy jarnasy aýdarylady. Osylaısha, múgedektigi bar balalardy tárbıelep otyrǵan ata-analardyń zeınetkerlik jasqa jetken kezde qajetti eńbek ótili men zeınetaqy jarnalarynyń somasy jınaqtalady. Bul olarǵa keıin tıisti deńgeıde zeınetaqy alýǵa múmkindik beredi. Al múgedektigi bar balasy 18 jasqa tolǵanǵa deıin tárbıelep otyrǵan anasyna nemese ákesine aı saıyn memlekettik járdemaqy (74 428 teńge) tólenedi jáne oǵan qosa balanyń múgedektigi úshin járdemaqy tólenedi, - dep jazady Oljas Bektenov.
Buǵan deıin Qazaqstan elshiliginiń Reseı SІM-ine nota joldaǵany Úkimettiń depýtattyq saýalǵa joldaǵan jaýabynan málim bolǵan edi.