Jasandy júrek ornatylǵan Taraz turǵynynyń búgingi ómiri qandaı
TARAZ. QazAqparat - 55 jastaǵy tarazdyq Dmıtrıı Kım keýdesine jasandy mehanıkalyq júrek ornalastyrylǵan óńirdegi alǵashqy adam. Oǵan osydan 9 aı buryn eń kúrdeli ota jasalǵan, dep habarlaıdy QazAqparat tilshisi.
Dmıtrıı mıokard ınfarktisi men qaterli gıpertonııalyq aýrý saldarynan aýyr júrek jetispeýshiligine ushyraǵan. Sol sebepti úsh jyl mamandardyń baqylaýynda bolǵan. Qan qysymy únemi joǵary deńgeıdi kórsetip, demikpege shaldyqqan. Óz betinshe tynys alýy da qıyndap ketken eken. Sońǵy talmadan soń, dárigerler Dmıtrııge júrektiń sol jaq jasandy qarynshasyn aýystyrý operatsııasyn jasaýǵa sheshim qabyldaǵan. Osy kúrdeli otadan soń naýqastyń jaǵdaıy jaqsarǵan. Qazir ol ózin ómirge qaıta kelgendeı sezinýde.
«Aldymen, maǵan ómir bergen Jaratýshyǵa, odan soń osy ortalyqtyń dárigerlerine rızashylyǵym sheksiz. Osyndaı ota jasalmaǵanda jáne ol sátti ótpegende, men qazir sizdermen tildesip turmas edim. Qazir ózimdi jaqsy sezinetinim sonshalyqty, ómirge degen yntam men qulshynysym burynǵydan da artty. Densaýlyǵym ońalǵan soń aldaǵy ýaqytta biraz ister tyndyramyn degen úmittemin», - deıdi ol.
Búginde Dmıtrıı Kım qandaı da bir fızıkalyq shekteýlersiz tolyqqandy ómir súrýde. Kóbine jaıaý júredi eken. Dene shynyqtyrýmen aınalysyp, kólikten góri velosıpedke mingendi jón sanaıdy.
Aıta keteıik, jasandy júrek - bıonıkalyq ımplantat, ol adam júregin jartylaı nemese tolyqtaı aýystyrady. Keıde qosymsha júrek retinde paıdalanylady. Ony ornatqan soń adam denesinde qan aınalymy qalypqa túsedi. Apparat naýqastyń ómirin kem degende bes jáne odan da kóp jylǵa uzartady. Bul - sozylmaly júrek aýrýyna shaldyqqan naýqas úshin ómirdiń syıy ispetti.
