Jasandy uryqtandyrýǵa memleketten aqsha bólgen durys emes - mınıstr Birtanov
"Biz jyl saıyn ekstrakorporaldy uryqtandyrýǵa kvota bólip otyramyz. Árıne, ol jetkiliksiz. Men bilemin. Biraq aldaǵy ýaqytta kvotany kóbeıtýge qatysty josparymyz joq. Sebebi oǵan biraz qarajat qajet. Meniń oıymsha, jasandy uryqtandyrýǵa suranys kóp bolsa da, memleket tarapynan oǵan aqsha bólgen durys emes. Óıtkeni bul - tym qymbat protsedýra. Damyǵan memleketterde ondaı kómek tegin berilmeıdi", - dedi E.Birtanov xalyq aldynda esep berý kezdesýinde.
Mınıstrdiń aıtýynsha, aldaǵy ýaqytta jatyrdan tys uryqtandyrý sharalaryn áleýmettik saqtandyrý júıesine aýystyrý josparlanyp otyr.
"Sonda ekstrakorporaldy uryqtandyrýdyń sanyn arttyrýǵa múmkindik ashylady. Qazirgi bizde basqa da óte kúrdeli máseleler bar. Mysaly, onkologııalyq aýrýlar, adam ólimine sebep bolatyn aýrýlar qanshama. Aldymen osyny sheshýimiz kerek. Odan keıin basqa jaǵdaılarǵa da kóshýge múmkindik bolady. Sondyqtan qazir jasandy uryqtandyrýdyń kepildik kólemin kóbeıtpeımiz. Standart boıynsha qandaı texnologııalar kiredi, sony tegin beremiz. Biraq qalǵanyn azamattar ózderi tóleýi kerek", - dep atap kórsetti E.Birtanov.
Aıta keteıik, búgingi kezdesý kezinde mınıstr fast-fýdty shekteýge qatysty pikir bildirdi.
Budan bólek, Astanadaǵy perzentxanada analarynan aıyrylǵan eki náresteniń jaǵdaıy jaıynda aıtyp berdi.
Jedel járdem máselesi de sóz boldy.