Jasandy uryqtandyrýdy arzandatýǵa bolady - Saltanat Baıqoshqarova
ASTANA. QazAqparat - Búginde jasandy uryqtandyrýǵa ketetin aqshanyń basym bóligi dári-dármekterge jumsalady. Qazaqstandaǵy jasandy uryqtandyrýdyń avtory, bıologııa ǵylymdarynyń doktory Saltanat Baıqoshqarovanyń aıtýynsha, atalǵan shyǵyndardy úsh esege qysqartýǵa bolady, dep xabarlaıdy QazAqparat tilshisi.
"Qazirgi kezde jasandy uryqtandyrýdyń ortasha baǵasy - 1 mln teńge. Sonyń 600 myń teńgesi dári-dármekterge ketedi. Al devalvatsııadan keıin barlyq preparattar 2-2,5 esege qymbattady. Sol sebepti buryn dári-dármekterge 100-250 myń ketse, qazir 500-600 myń kerek. Oǵan jasandy uryqtandyrý mıkroxırýrgııasy men kreokonservatsııany qosyńyz, taǵy 500 myń teńge qajet bolady. Demek, ekstrakorporaldy uryqtandyrý baǵdarlamasy aıasynda aqshanyń 60-70 paıyzy dári-dármekterge ketedi", - deıdi S.Baıqoshqarova.
Onyń aıtýynsha, atalǵan shyǵyndardy barynsha qysqartýǵa bolady. Tipti, keıbir preparattardy qoldanbaı-aq, áıeldiń bala kóterýine jaǵdaı jasaýǵa múmkindik bar. "Máselen, jas kelinshekter bar. Sosyn áıelder bar. Olarda analyq jasýshylardyń bólinýi ártúrli. Soǵan qaraı dári-dármekterdi qoldanýǵa bolady. 50 myń nemese 100 myń teńge ketedi. Bálkim, dári-dármek salýdyń múldem qajeti bolmas. Sonda jasandy uryqtandyrýdyń ózine ǵana 300-500 myń teńgedeı ketedi", - dep atap kórsetti S.Baıqoshqarova.
