Jasandy uryqtandyrýdan týǵan balanyń densaýlyǵy qalaı bolady
ASTANA. QazAqparat - Qazaqstandaǵy jasandy uryqtandyrýdyń avtory, bıologııa ǵylymdarynyń doktory Saltanat Baıqoshqarova ekstrakorporaldy uryqtandyrýdan týatyn balalardyń densaýlyǵyna týraly aıtyp berdi, dep xabarlaıdy QazAqparat tilshisi.
«Jasandy uryqtandyrý arqyly dúnıege kelgen adam bala kótere alady. Endi, bylaı qarasań, jasandy uryqtandyrýdy jasaıtyn erkek pen áıel deni saý adamnan týǵan joq pa? Negizi, jasandy uryqtandyrýdy bir ret jasasa, nátıje bolmaýy da múmkin. Barlyǵy adamnyń densaýlyǵyna baılanysty. Bireýdiń múmkindigi 100 paıyz bolady. Endi bireýlerde 10-aq paıyz. Ortasha eseppen jasandy uryqtandyrýdyń 30-40 paıyzy sátti shyǵady», - dedi S.Baıqoshqarova jýrnalısterge bergen suxbatynda.
Onyń aıtýynsha, jasandy uryqtandyrýda balanyń jynysyn birden anyqtaýǵa bolady. «Ol úshin genetıkalyq dıagnostıka jasalady. Sol kezde embrıonnyń ul, ne qyz ekenin bilýge bolady. Biraq genetık degen óte kúrdeli mamandyq. Dúnıejúzinde eń damyǵan memleketterdiń ózderi genetıkalyq saraptamaǵa júz paıyz kepildik bere almaıdy. Ótkende Izraıldiń bir professory Lına Bazer keldi. Ol Tel-Avıvtiń úlken genetıkalyq ortalyǵynda isteıdi. Sol aıtady, biz qanshama zerttep, keremet bolyp jatsaq ta, barlyq suraqtarǵa jaýap bere almaımyz. Óıtkeni ǵylym úshin beımálim jaǵdaılar kóp», - dep atap kórsetti S.Baıqoshqarova.
Aıta keteıik, búgin Astanada ótken konferentsııa aıasynda S.Baıqoshqarova jasandy uryqtandyrýdy barynsha arzandatýǵa bolatynyn jetkizdi. Onyń aıtýynsha, búginde qyz-kelinshekter nesıesin óteý úshin analyq jasýshasyn tapsyrýda. Al 100 er adamnyń tek 2-3-eýiniń ǵana uryǵy jaramdy.
