Jasandy uryqtandyrý: Jyl saıyn 7 myń kvota bólinedi

NUR-SULTAN. QazAqparat – Ekstrakorporaldy uryqtandyrýǵa jyl saıyn 7 myń kvota bólinedi. Bul týraly halyq aldynda esep berý kezdesýinde QR Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

«Biz úshin eń basym baǵyttardyń biri ana men balany qorǵaý bolyp qala beredi. Statıstıkalyq derekter boıynsha 2021 jylǵy 1 qańtardaǵy jaǵdaı boıynsha elimizde bala týatyn jastaǵy 4 mln 645 myń áıel ómir súrip jatyr, bul 2019 jyldyń uqsas kezeńiniń kórsetkishterinen 26 myńǵa artyq. Júkti áıelderdiń sany 436 myńǵa jýyq boldy, olardyń sany 2020 jyly 2019 jylmen salystyrǵanda 21 myńǵa artty. Sonymen qatar, 2020 jyly bosaný sany ótken jylmen salystyrǵanda 22 myńǵa artty», - dedi mınıstr Ortalyq kommýnıkatsııalar qyzmetinde.

Onyń aıtýynsha, ótken jyly tiri týǵan balalar sany 427 myńnan astam adamdy qurady, bul 2019 jylmen salystyrǵanda 24 myńǵa artyq.

«Memleket basshysynyń 2020 jylǵy 1 qyrkúıektegi Qazaqstan halqyna Joldaýynda bergen tapsyrmalaryn iske asyrý aıasynda biz ekstrakorporaldyq uryqtandyrýǵa kvotalar sanyn 2020 jylǵy 1 105-ten 2021 jyly 7 myńǵa deıin ulǵaıttyq. Jyl saıyn halyqqa 7 myń kvota beriletinin aıta ketý kerek. Respýblıkanyń 8 qalasynda qazirgi ýaqytta qosalqy reprodýktıvtik tehnologııalar qyzmetin oryndaıtyn 27 klınıka jumys isteıdi, olardyń 19-y MÁMS aıasynda qyzmet kórsetedi», - dedi A. Tsoı.