Jasandy tyrnaq ósirý: paıdasy men zııany
ASTANA. QazAqparat - Uzyn, ádemi tyrnaq stıl men sánniń sımvolyna aınalǵaly qashan. Qazirgi tańda kez kelgen isker áıeldi sándi manıkıýrsiz elestetý qıyn. Sony bilgen sán salondary da qyzyldy-jasyldy jarnamasymen kóz ben sanany jaýlaýda, dep jazady massaget.kz.
Jasandy tyrnaq ósirmes buryn, gel men akrıldyń qaısysymen ósirgen qolaıly ekenin bilip alǵan jón.
Tyrnaq árleýshi sheberdiń kabınetine kirseńiz bolǵany, tym qysqa, kútimsiz tyrnaǵyńyz birneshe saǵattyq eńbekten soń áp-ádemi túrge enedi. Tyrnaqty gelmen jáne akrılmen ósiredi. Bireýinen ekinshisi artyq deýge kelmeıdi, ekeýiniń de jaqsy jáne jaman jaqtary bar.
Gel - allergendi tustary az materıal, sondyqtan gel jaǵyp ósirgen tyrnaq yńǵaıly. Alaıda ol tyrnaqty syndyryp ne zaqymdap alsańyz, barlyǵyn túgeldeı sheship, qaıtadan jasaý kerek.
Kóp mamandar akrılmen jasandy tyrnaq jasaýdy qoldaıdy. Óıtkeni akrıl bar bolǵany eshqandaı yqpalsyz, ózdiginen qatyp qalady jáne qosymsha aspaptardy qajet etpeıdi. Oǵan qosa, akrılden jasalǵan tyrnaqty alyp tastaý anaǵurlym ońaı.
Jasandy tyrnaq ósirýdiń paıdasy paıdasy
Árıne, jasandy tyrnaq ósirýdiń paıdaly áseri bolmasa, kóptegen arýlar ol úshin sonsha ýaqyty men aqshasyn ketirmes edi. Gel jáne akrılmen tyrnaq ósirýdiń ortaq jaqsy jaqtary bar:
- Uzyn, ádemi tyrnaqtardyń tabıǵı tyrnaqtan esh aıyrmashylyǵy bolmaı qalady;
- Óz tyrnaǵyńyzdyń qısyq-qyńyr jaqtaryn, barlyq kemshilikterin jasyryp turady;
- Uzyn tyrnaqqa kóńilińiz qalaǵan kez kelgen órnekter men sýretterdi sala alasyz;
- Betine jaqqan tyrnaq boıaýy uzaq ýaqyt buzylmaı saqtalady;
- Jaısyzdyq bolmaıdy, jańa tyrnaqqa tez úırenip ketesiz.
Jasandy tyrnaq ósirýdiń zııany:
- Gelden bolsyn, akrılden bolsyn, jasandy tyrnaqqa eki aptada bir ýaqtyly korrektsııa jasap otyrý kerek. Ol úshin taǵy da uzaq ýaqyt pen aqsha qajet.
- Gelmen ósirilgen tyrnaqty alyp tastaýǵa bolmaıdy, ony túgeldeı úgitý kerek. Al ony tek tyrnaq árleý sheberi ǵana jasaı alady.
- Jasandy tyrnaq ósirgennen keıin óz tyrnaǵyńyz juqaryp, álsiz bolyp qalady. Jasandy tyrnaqty sheshken soń erekshe kútimdi qajet etedi.
Qandaı jaǵdaıda jasandy tyrnaq jasatýǵa bolmaıdy?
Jasandy tyrnaqty kez kelgen adam kez kelgen ýaqytta jasata alady. Alaıda múlde qaıshy keletin jaǵdaılar da bar:
- Zaqymdanǵan jáne qyshyma aýrýy (grıbok) bar tyrnaqty jasandy jolmen ósirýge bolmaıdy;
- Tyrnaq aınalasyndaǵy et (kýtıkýla) zaqymdanǵan jaǵdaıda (mysaly, kesip alsańyz) jasandy tyrnaq jasatpańyz. Óıtkeni jaraǵa gel ne akrıl tússe, asqynyp ketýi ábden múmkin;
- Júregi aýyratyn, qan tamyrlary aýrýymen aýyratyn, qant dıabeti bar adamdarǵa jasandy tyrnaq salýǵa bolmaıdy;
- Qoly óte qatty terleıtin adam jasandy tyrnaqty múlde umytqany jón;
- Antıbıotık nemese gormonaldy dáriler qabyldaý kezeńinde de jasandy tyrnaq salýǵa bolmaıdy.
