Jasandy et rasynda da ekonomıkaǵa aýyr soqqy bola ma? - zertteý
NUR-SULTAN. QazAqparat - Frantsııanyń Slate.fr basylymy jasandy ettiń ekonomıkalyq jáne medıtsınalyq apatqa ushyratatyny anyqtalǵan zertteýler týraly maqala jarııalady.
«Álem boıynsha et naryǵynyń aınalymy jylyna180 mlrd evrony quraıdy», deı kele avtor alty jyl buryn Gollandııa ǵalymdary jasandy et ónimderin jasap shyǵarǵanyn jazady.
«Qazir túrli zerthanalarda janýarlar kletkasynan jasalǵan jasandy et shyǵarý qalypty tájirıbege aınaldy. Túrine qaraǵanda etten aýmaıtyn mundaı ónimder shyǵarýǵa 250 myń evro ketedi. Janýarlardy óltirmeı et alý búgingi tańda ǵylymı fantastıka sanalmaıdy. Bul salaǵa tipti quıylyp jatqan ınvestıtsııa da kóbeıip jatyr. Rıchard Brenson, Bıll Geıts, Leonardo Dı Kaprıo sııaqty tanymal adamdar da osy sektorǵa aqsha salyp jatqany belgili», dep jazady basylym.
Avtordyń aıtýynsha, jasandy etten býrger jasaıtyn alǵashqy kompanııa Gollandııada ashylǵan. Bul kompanııa 2021 jyly ónimderin kópshilikke qoljetimdi etip, bir býrgerdi on evroǵa satatynyn habarlady.
«Bul salanyń maqsaty - et ónimderin arzandatý. Jasandy et óndirýshi kompanııa ónimdi et túrine baılanysty ortasha eseppen qyryq tórt kúnde alady. Al sıyr etin almas buryn ony eń keminde birneshe jyl ósirý kerektigi belgili», dep jazady basylym.
Avtordyń aıtýynsha, jasandy et ekologııalyq faktor nátıjesinde paıda bolǵan.
«Degenmen, jasandy etke kúmánmen qaraýshylar kóp. Sonymen qatar jasandy et óndirisine túrli hımıkattar paıdalanylady. Bul medıtsınalyq turǵydan keri áserin tıgizetini anyq. Al arzan ónim retinde jasandy et ekonomıka salasyna da aýyr soqqy bolady», dep jazady avtor.
