Jasandy et halal ma?
ASTANA. 14 tamyz. QazAqparat - Ǵalymdar zerthanada sıyrdyń stvol jasýshasyn etke aınaldyrdy. Muslim kz saıtynyń jazýynsha, osyǵan oraı jasandy jolmen alynǵan etti musylman balasy jeýine bola ma degen qyzý pikirtalas órbigen edi.
Jaqynda Londonda gollandııalyq ǵalymdar sıyrdyń stvol jasýshasynan alynǵan etten jasalǵan kotletti jurttyń nazaryna usyndy. Taǵam sarapshylary baspasóz máslıhatynda osyndaı jolmen daıyndalǵan kotletke joǵary baǵa bergen kórinedi. Bul jańalyq etti aýzyna almaıtyn vegetarıandar men janýarlardy qorǵaý uıymdaryn bir jelpintip tastady.
«Mal soıylýy kerek»
Dese de, asyl dinimizde azyq retinde paıdalanylatyn maldyń eti tákbir aıtylyp soıylýy ári qany aǵýy tıis. Iýdeıler de osyndaı pikirde ekenin aıta ketý kerek. Olardyń dininde et pen sútti bir ydysta daıyndaýǵa jáne bir mezgilde tutynýǵa tyıym salynǵan. Sol sebepti, ıýdeıler «chızbýrgerdi» aýyzdaryna da almaıdy. Alaıda, ıýdeılerdiń bul erejesi zerthanada alynǵan etke júrmeıtin sekildi. Ravvın Menahama Genakanyń sózine qaraǵanda, zerthanada alynǵan «et ónimi» ne etke de, ne sútke de jatpaıdy. Dese de, Genakanyń aıtýynsha, jasýsha soıylǵan maldyń etinen alynýy tıis.
Din bilgirleri: «Eger ónim taza bolsa, eshqandaı másele joq»
Aıdyn ýnıversıtetiniń áleýmettik zertteýler dırektory, dintanýshy professor Saım Ielrymnyń pikiri de osyǵan saıady: «Adam tutynatyn zat sharıǵat boıynsha taza bolmaǵy lázim. Adam aǵzasyna zııany tımeıtindi haram deýdiń negizi joq».
Al Ankara ýnıversıtetiniń dintaný fakýltetiniń qurmetti professory Beıza Bilgin: «Bul taraptaǵy zertteý áli aıaǵyna jetken joq. Dese de, tazalyqtyń máni zor. Qatty ashyqqan jaǵdaıda haram nárselerdi de jeýge bolady»,- dep qaıyrdy óz oıyn.
