Jasandy ıntellektti damytý men retteýge áıelderdi tartý mańyzdy — Ásel Janasova
ASTANA.KAZINFORM — Qazaqstan Respýblıkasy Prezıdenti Ákimshiligi basshysynyń orynbasary Ásel Janasova Astanada ótken Silk Power 2026 alańynda sóz sóılep, jasandy ıntellektti damytýda áıelderdiń úlesiniń mańyzdylyǵy týraly aıtty. Sondaı-aq ol jasandy ıntellekt agentteri óziniń kúndelikti ómirinde qalaı kómektesip júrgenin aıtty.
Іs-shara Halyqaralyq áıelder kúni qarsańynda Uly dala áıelderiniń kúshti, táýelsiz ári jan-jaqty beınesine arnaldy.
Ásel Janasova óz sózinde jasandy ıntellekttiń qarqyndy damýy jaǵdaıynda áıelderdiń tehnologııa salasyndaǵy róli erekshe mańyzdy ekenin atap ótti.
Onyń aıtýynsha, Qazaqstanda jańa tehnologııalardy damytýǵa arnalǵan normatıvtik-quqyqtyq baza qalyptasyp jatyr. Atap aıtqanda, jasandy ıntellektti qoldanýdy retteıtin orta qalyptastyratyn Tsıfrlyq kodeks qabyldanǵan.
— Eger biz jasandy ıntellektti belsendi damytatyn bolsaq, bul protseske áıelderdiń úles qosýy óte mańyzdy. Áıtpese tehnologııalar kóbine er adamdardyń tájirıbesi men kózqarasyna negizdelip qalyptasý qaýpi bar. Sondyqtan tepe-teńdik saqtaý úshin áıelderdiń de jasandy ıntellektti jasaýǵa qatysýy qajet. Sonda júıeler teńgerimdi bolyp, qoǵamnyń barlyq qajettilikterin eskeretin bolady, — dedi ol.
Osyǵan baılanysty Janasova qonaqtarǵa JI-agentteriniń (jasandy ıntellekt agentteri) róli artyp kele jatqanyn aıtty. Bul — adamnyń ornyna belgili bir tapsyrmalardy oryndaı alatyn baǵdarlamalyq júıeler, olar jumys barysynda da, kúndelikti ómirde de kómekshi bola alady.
— Qazirgi tańda kóp adam jasandy ıntellekt pen JI-agentterdiń naqty ne úshin qajet ekenin tolyq túsine bermeıdi. Biraq qazirdiń ózinde keıbir kompanııalar qyzmetkerlerdiń ornyna JI-agentterdi paıdalanyp, bıznes ashyp jatyr. Olar taldaý jasaýdan bastap, klıentterge qyzmet kórsetýge deıingi túrli mindetterdi oryndaı alady, — dedi Janasova.
Onyń aıtýynsha, mundaı tehnologııalar memlekettik ınstıtýttar deńgeıinde de qarastyrylyp jatyr.
— Búgin Aqordada jasandy ıntellekt qoldanylatyn birneshe baǵdarlamany qarastyrdyq. Mysaly, sot júıesinde JI-agentter birneshe saǵattyń ishinde taldaý jasap, negizgi sheshimderdi qabyldaýǵa kómektese alady, — dedi ol.
Spıker mundaı tehnologııalar kúndelikti ómirde de úlken kómekshi bola alatynyn atap ótti. Onyń aıtýynsha, jasandy ıntellekt arqyly tájirıbeli mamandardyń tsıfrlyq «klondaryn» jasaýǵa bolady. Mysaly, bilikti ustazdardyń tsıfrlyq nusqalaryn bilim berý maqsatynda qoldanýǵa múmkindik bar.
Onyń sózinshe, mundaı sheshimder aýyldyq jerlerdegi balalarǵa da eń úzdik muǵalimderden bilim alýǵa múmkindik beredi.
Tehnologııalardyń bolashaǵy týraly aıta kele, Janasova qyz balalardyń naqty ǵylymǵa qyzyǵýshylyǵyn arttyrý qajet ekenin aıtty.
— Kelesi urpaq júıeli oılaı bilýi kerek. Matematıka, logıka jáne naqty ǵylym — kez kelgen damýdyń negizi. Qyzdardy básekeli ortada tárbıeleý qajet, sonda olar bul baǵyttarda ózderin synap kórýden qoryqpaıdy, — dedi ol.
Aıta keteıik, Silk Power 2026 alańy qazirgi zamanǵy áıeldiń róli men onyń qoǵamdyq, ekonomıkalyq jáne tehnologııalyq kún tártibine qatysýyn talqylaý úshin ártúrli saladaǵy 70-ten astam áıeldi biriktirdi.
