Jasandy ıntellektiniń tyń múmkindikteri jastardyń áleýetin arttyrýǵa jol ashady - Prezıdent
ASTANA. KAZINFORM – Qasym-Jomart Toqaev Astana AI Film Festival halyqaralyq kınofestıvaliniń ashylý saltanatyna qatysty, dep habarlaıdy Aqorda.
Prezıdenttiń pikirinshe, jasandy ıntellektiniń tyń múmkindikteri jastardyń áleýetin arttyrýǵa jol ashady
– Qazirgi tańda shaǵyn shyǵarmashylyq ujymdar úlken stýdııalarmen básekelese alady. Shyǵarmashylyq adamdary men túsirilim toptary úshin fılm túsirýde prodıýserlik kompanııalardyń tabaldyryǵyn tozdyryp, demeýshi izdeýdiń qajeti joq. Naryqqa shyǵýdyń joly áldeqaıda jeńildedi. Bul bir jaǵynan básekelestikti arttyryp, ekinshi jaǵynan talantty adamdardyń ózin tanytýyna múmkindik beredi. Osy oń ózgeristerdi kreatıvti qaýymdastyqty biriktirý jolynda tıimdi paıdalanýymyz kerek. Árıne, jasandy ıntellekt asqan daryn ıesimen shendese almaıdy, degenmen ǵumyryn shyǵarmashylyqqa arnaǵan adamdar úshin taptyrmaıtyn kómekshi, – dedi Prezıdent.
Memleket basshysy Astana AI Film Festival halyqaralyq baıqaýynyń talantty ári maqsatshyl jandarǵa tyń múmkindik syılap, álemdik kreatıvti ındýstrııany ilgeriletýge septigin tıgizetinine senim bildirdi.
– Astana tórinde osyndaı jahandyq aýqymdaǵy is-sharanyń ótýi kezdeısoq emes. Qazaqstan – jastardyń eli, halqymyzdyń ortasha jasy – 33 jas. Men Qazaqstan jastaryn bilimge umtylatyn, jańalyqqa qushtar, ozyq oıly azamattar dep sanaımyn. Jaqynǵa da, alysqa da meıirimmen qaraý, eshkimdi bólip-jarmaý – halqymyzdyń boıynda bar asyl qasıet. Muny álem jurtshylyǵy da jaqsy biledi jáne moıyndaıdy dep oılaımyn. Máselen, búgingi festıvalge álemniń 125 elinen 8 myńnan astam ótinim kelip tústi. AQSh, Úndistan, Qytaı, Ońtústik Koreıa, Ulybrıtanııa, Indonezııa, Japonııa, Brazılııa, Frantsııa jáne ózge de el azamattary óz jumysyn joldady. Osy tusta qazylar alqasynyń quramynda álemge áıgili óner jáne tehnologııa salasynyń mamandary bar ekenin aıryqsha atap ótkim keledi. Men búgin barshańyzǵa erekshe alǵys aıtamyn. Osy baıqaýdyń arqasynda qatysýshylar ózara tájirıbe almasyp, bolashaqta birlesken jobalardy júzege asyrady dep senemin, – dedi Qasym-Jomart Toqaev.
Іs-sharanyń ashylý saltanatynda Astana AI Film Festival halyqaralyq festıvaliniń negizin qalaýshy Almas Jalı, Freedom Holding Corp bas dırektory Tımýr Týrlov, Network School negizin qalaýshy Baladjı Shrınıvasan, festıval qatysýshysy Djamın Tasker jáne Astana AI Film Festival halyqaralyq festıvali qazylar alqasynyń tóraǵasy Odrı Azýle sóz sóıledi.
